އެގްރޯނެޓްގެ މަސައްކަތް އަލުން ފަށަނީ

އަލީ ރާޒީ

12 މާޗް 2025 - 14:43

0 comments

ރައީސް ޑރ. މުހައްމަދު މުއިއްޒުގެ ސަރުކާރުން އުވާލުމަށް ނިންމާފައި އޮތް އެގްރޯ ނެޝަނަލް ކޯޕަރޭޝަން ލިމިޓެޑް (އެގްރޯނެޓް)ގެ މަސައްކަތް އަލުން ފެށުމަށް ސަރުކާރުން ނިންމައިފި އެވެ.

ސަރުކާރުން ދަނޑުވެރިކަމުގެ ވިޔަފާރިކުރަން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން 2020 ގައި އުފެއްދި ކުންފުނި އުވާލައި އެ ކުންފުނީގެ ދަށުން ކުރާ މަސައްކަތް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީ ޒޯން (އެމްއައިޑީއެފްސީޒެޑް) ގެ ދަށަށް ގެންދަން ނިންމީ، މިދިޔަ ސެޕްޓެމްބަރު މަހު އެވެ.

އެ ނިންމުމާއެކު، ކުންފުނިން ދަނޑުވެރިންނާ އެކު ހިންގަމުން ދިޔަ މުއާމަލާތްތައް ހުއްޓާލާފައިވަނީ މިދިޔަ އަހަރުގެ ނޮވެންބަރު މަހު އެވެ.

ދަނޑުވެރިކަމާ ބެހޭ ވުޒާރާ އިން ބުނީ އެގްރޯނެޓް އުވާލަން ނިންމާފައި އޮތް މައްސަލަ ރައީސުލްޖުމްހޫރިއްޔާ ވަޒީރުންގެ މަޖިލީހަށް ހުށައަޅުއްވައި، ކުރީގެ އެ ނިންމުމަށް ބަދަލު ގެންނަވައި، އެގްރޯނެޓަކީ އެމްއައިޑީއެފްސީޒެޑްގެ ސަބްސިޑަރީ ކުންފުންޏެއްގެ ގޮތުގައި ހަމަޖެއްސެވުމަށް މިހާރު ނިންމަވާފައިވާ ކަމަށެވެ.

އެމްއައިޑީއެފްސީޒެޑް އަކީ ގައުމުގެ އުފެއްދުނަތެރިކަން އިތުރުކޮށް، އިގްތިސާދު ހަރުދަނާ ކުރުމަށް ޖެނުއަރީ 2، 2024 ގައި އުފައްދަވާފައިވާ ކުންފުންޏެކެވެ.

އެމްއައިޑީއެފްސީޒެޑްގެ ސަބްސިޑަރީއެއްގެ ގޮތުގައި އެގްރޯނެޓްގެ މަސައްކަތް އަލުން ފެށުމުގެ މަގުސަދަކީ ދަނޑުވެރިކަމުގެ ސިނާއަތުގެ މަސައްކަތްތައް އިތުރަށް ހަރުދަނާކޮށް، ދަނޑުވެރިން ހައްދާ ތަކެތި ވިއްކޭނެ އިތުރު މަގުތައް ފަހިކޮށް، ދަނޑުވެރިކަމުން އިތުރު އާމްދަނީ ހޯދޭނެ ގޮތްތައް ފަހިކުރުން ކަމަށްވެސް ދަނޑުވެރިކަމާ ބެހޭ ވުޒާރާ އިން ބުންޏެވެ.