ދަނޑުވެރިންނަށް ދޫކުރާ ލޯނަށް ހުޅުވާލައިފި

ހުނައިދާ ޔާސިރު

09 އޯގަސްޓް 2026 - 11:05

0 comments

އިސްލާމީ ފައިނޭންސިން ނިޒާމަށް ބަދަލުކޮށް، "ދަނޑުވެރި މަންފާ" އެގްރިބިޒްނަސް މެޗިން ގްރާންޓް ޕްރޮގްރާމުގެ ދެވަނަ ބުރާއި "ދަނޑުވެރި ނަފާ" ލޯނު އިފުތިތާހުކޮށްފިއެވެ.

ދަނޑުވެރިކަމާ ބެހޭ މިނިސްޓްރީން ބުނި ގޮތުގައި އެއީ މިނިސްޓްރީ އާއި އިންޓަނޭޝަނަލް ފަންޑް ފޯ އެގްރިކަލްޗަރަލް ޑިވެލޮޕްމަންޓް (އިފާޑް) އާ ގުޅިގެން ހިނގަމުންގެންދާ "މޯލްޑިވްސް އެގްރިބިޒްނަސް ޕްރޮގްރާމް (މެޕް)" ގެ ދަށުން ދަނޑުވެރިންނަށް މާލީ އެހީތެރިކަން ފޯރުކޮށްދިނުމަށް 15 މިލިއަން ރުފިޔާގެ މެޗިން ގްރާންޓް ސްކީމްގެ ދެވަނަ ބުރެވެ.

މިނިސްޓްރީގެ ދަށުން ދަނޑުވެރިންނަށް މާލީ އެހީތެރިކަން ފޯރުކޮށްދެމުން ދިޔަ ނަފާ ލޯނު ސްކީމް ވެސް އިސްލާމީ ފައިނޭންސް ނިޒާމަށް ބަދަލުކޮށް، ނަފާ ސްކީމް ތައާރަފު ކޮށްފައިވާއިރު މިނިސްޓްރީން ބުނީ އެ ދެ ސްކީމަކީ ވެސް އެސްއެމްއީ ޑިޖިޓަލްއާ ގުޅިގެން ހިންގާ ސްކީމުތަކެއް ކަމަށެވެ.

އޭގެ ތެރެއިން ދަނޑުވެރި މަންފާ ސްކީމް އަމާޒުކޮށްފައި ވަނީ މެޕްގެ ހަރަކާތްތައް ކުރިއަށް ގެންދާ ހއ. އާއި ހދ. އަދި ށ. އަތޮޅުގެ ރަށްތަކުގެ ދަނޑުވެރިންނާއި ދަނޑުވެރިކަމުގައި ހަރަކާތްތެރިވާ އެންޖީއޯ އާއި ކުދި އަދި މެދުފަންތީގެ ވިޔަފާރިތަކާއި ކޯޕަރޭޓިވް ސޮސައިޓީތަކަށެވެ.

މިނިސްޓްރީން ބުނީ އެ ގްރާންޓުގެ ފުރަތަމަ ބުރު ނިންމީ ވަރަށް ކާމިޔާބުކަމާ އެކު ކަމަށާއި ދެވަނަ ބުރުގައި ވެސް ހުޅުވާލާފައި ވަނީ ހަމައެކަނި ކްލައިމެޓް ސްމާޓް ޕްރޮޑަކްޝަނަށް ކަމަށެވެ. އެއީ ގްރީންހައުސް އިންސްޓޯލްކޮށް، ހައިޑްރޮޕޯނިކްސް ސިސްޓަމް ނުވަތަ އެހެންވެސް މީޑިއަމްއެއް ގާއިމްކޮށްގެން ދަނޑުވެރިކަންކުރުމެވެ.

އެސްއެމްއީ ޑިޖިޓަލް ޕޯޓަލް މެދުވެރިކޮށް އެ ސްކީމަށް އެދި ހުށަހެޅޭނެ ކަމަށް މިނިސްޓްރީން ބުންޏެވެ.

"ދަނޑުވެރި ނަފާ" ލޯނުގެ އަމާޒަކީ ޒަމާނީ ދަނޑުވެރިކަން ކުރުމަށް ބޭނުންވާ ތަންތަން ގާއިމުކުރުމަށް ދަނޑުވެރިންނަށް މަގުފަހިކޮށްދިނުން ކަމަށް ވެސް، އެގްރިކަލްޗާ މިނިސްޓްރީން މައުލޫމާތު ދެއެވެ.

މިނިސްޓްރީން ބުނީ އެ ސްކީމްގެ ދަށުން، ވެޓް ޚިދުމަތްތަކާއި ޕެޓް ސަޕްލައިކުރުން ފަދަ މަސައްކަތްތަކަށް ވެސް ފައިސާ ދޫކުރާނެ ކަމަށެވެ