އީޔޫއަށް ކަނޑައަޅާފައި ހުންނަވާ ސަފީރު ގީލާ ސަފީރުކަމުގެ ފަތްކޮޅު އަރުވައިފި

އިސްމާއިލް ރިޒާ

11 ޖުލައި 2024 - 12:10

0 comments

ޔޫރަޕިއަން ޔޫނިއަނަށް ދިވެހިރާއްޖެއިން ކަނޑައަޅާފައި ހުންނަވާ ސަފީރު ޤީލާ އަލީ، އެކަމަނާގެ ސަފީރުކަމުގެ ފަތްކޮޅު ކައުންސިލް އޮފް ދަ ޔޫރަޕިއަން ޔޫނިއަންގެ ރައީސް، ޗާލްސް މިޝެލް އަށް އަރުވައިފި އެވެ.

ފަތްކޮޅު އެރުވުމުގެ ރަސްމިއްޔާތު ބާއްވަވާފައިވަނީ ބްރަސެލްސް ގައި ހުންނަ "ޔޫރޮޕާ" ބިލްޑިންގގަ އެވެ.

ފަތްކޮޅުއެރުވުމުގެ ރަސްމިއްޔާތަށްފަހު ބޭއްވެވި ބައްދަލުވުމުގައި ސަފީރު ޤީލާ ޢަލީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ފަރާތްޕުޅުން ޔޫރަޕިއަން ޔޫނިއަންގެ ރައީސް ޗާލްސް މިޝެލް އަށް ތަހުނިޔާ އާއި ހެޔޮއެދުންތައް އަރިސްކުރައްވާފައިވެ އެވެ.

އަދި ރާއްޖެއާއި ޔޫރަޕިއަން ޔޫނިއަންއާ ދެމެދު ވެވުނު ފުރަތަމަ ފްރޭމްވޯކް އެގްރީމަންޓް ކަމަށްވާ "ސަމޯއާ އެގްރީމަންޓް" ސޮއިކުރުމުގެ މައްޗަށް އަލިއަޅުއްވާލައްވައި، ރާއްޖެއާއި ޔޫރަޕިއަން ޔޫނިއަންއާ ދެމެދު އޮތް ގުޅުން އިތުރަށް ބަދަހިކުރައްވާނެކަމުގެ ޔަޤީންކަން އެކަމަނާ ވަނީ ދެއްވާފަ އެވެ.

މީގެ އިތުރުން، ދިވެހިރާއްޖެ އިން ޔޫރަޕިއަން ޔޫނިއަނަށް ކަނޑައަޅާފައިވާ ސަފީރުގެ މަޤާމާ ޤީލާ ޢަލީ ހަވާލުވެވަޑައިގަތުމުން އެކަމަނާއަށް ޔޫރަޕިއަން ޔޫނިއަންގެ ރައީސް ޗާލްސް މިޝެލް ތަހުނިޔާ ވިދާޅުވިއެވެ. އަދި ދިވެހިރާއްޖެ އާއި ޔޫރަޕިއަން ޔޫނިއަނާ ދެމެދު އޮންނަ ގާތްގުޅުން އިތުރަށް ބަދަހިކުރުމުގެ މަސައްކަތުގައި ކައުންސިލް އޮފް ދަ ޔޫރަޕިއަން ޔޫނިއަންގެ ފުރިހަމަ އެއްބާރުލުން ލިބޭނެކަމަށް ކަށަވަރުކޮށްދެއްވި އެވެ.

ސަފީރު ޤީލާ އަލީގެ ފަތްކޮޅު އެރުވުމުގެ ރަސްމިއްޔާތުގައި އެކަމަނާ އަރިހުގާ ބެލްޖިއަމްގައި ހުންނަ ދިވެހިރާއްޖޭގެ އެމްބަސީގެ ފަސްޓް ސެކްރެޓަރީ، މުޙައްމަދު ޝައްފާއު އިބްރާހިމް އަދި ސެކަންޑް ސެކްރެޓަރީ ޙަސަން ނަވާފު ބައިވެރިވެވަޑައިގަތެވެ.