ރައީސް، ޔޫއެސްއެއިޑްގެ އިސްވެރިއަކާ ބައްދަލުކުރައްވައިފި

އަލީ ރާޒީ

25 ސެޕްޓެމްބަރ 2024 - 12:44

0 comments

ރައީސް ޑރ. މުހައްމަދު މުއިއްޒު، ޔޫއެސްއެއިޑްގެ އެޑްމިނިސްޓްރޭޓަރު ސަމަންތާ ޕަވައާ ބައްދަލުކުރައްވަނީ

ދިވެހިރާއްޖޭގައި ޕޭޕަލްގެ ހިދުމަތް ތައާރަފުކުރުމަށް ކުރާ މަސައްކަތްތަކުގައި އެހީތެރިވެދޭނެކަން ޔޫ.އެސް އޭޖެންސީ ފޮރ އިންޓަރނޭޝަނަލް ޑިވެލޮޕްމަންޓުން ހާމަކޮށްފި އެވެ.

ރައީސް އޮފީހުން ބުނީ އދ. ގައި މިހާރު ކުރިއަށް ގެންދާ އާންމު މަޖިލީހުގެ 79 ވަނަ ބައްދަލުވުމުގެ ހަވާސާގައި ރައީސް މުއިއްޒު، ޔޫއެސްއެއިޑްގެ އެޑްމިނިސްޓްރޭޓަރު ސަމަންތާ ޕަވައާ އިއްޔެ ބައްދަލުކުރައްވާފައިވާ ކަމަށެވެ.

އެ ބައްދަލުކުރެއްވުމުގައި ޔޫއެސްއެއިޑްގެ އެޑްމިނިސްޓްރޭޓަރު ރާއްޖެ އިން ހުށަހަޅާފައިވާ މުހިންމު ޕްލޭންތަކަށް ތައުރީފުކުރެއްވި ކަމަށާއި އެ ޕްލޭންތަކަށް އެ އެޖެންސީގެ އެހީތެރިކަން ލިބޭނެ ކަމަށް ވިދާޅުވި ކަމަށް ވެސް ރައީސް އޮފީހުން ބުންޏެވެ.

"ދިވެހިރާއްޖޭގައި ޕޭޕާލްގެ ހިދުމަތްތައް ބޭނުންކުރެވޭނެ މަގުފަހިކުރުމާއި އޯޕަން ގަވަމަންޓް ޕާޓްނާޝިޕް (އޯޕީޖީ)ގެ މެމްބަރުކަން ހޯދުމަކީ ރައީސުލްޖުމްހޫރިއްޔާގެ ތަރައްގީގެ ތަސައްވަރަށް ވާގިވެރިވެދޭ ކަންކަމަށް ވާނޭކަން ފާހަގަކުރައްވައި، މި ދާއިރާއިން ހުރި ފުރުސަތުތަކާ މެދު ވެސް ދެ ބޭފުޅުން މަޝްވަރާކުރައްވާފައިވެ އެވެ،" ރައީސް އޮފީހުން ބުންޏެވެ.

މި ބައްދަލުކުރެއްވުން ނިންމަވާލައްވަމުން ދެ ބޭފުޅުންވެސް ވަނީ، ދެ ފަރާތުގެ މަސްލަހަތު ހިމެނޭ ތަފާތު މައްސަލަތަކާމެދު އެކުގައި މަސައްކަތް ކުރައްވައި، ދެ ފަރާތަށް ފައިދާވާނޭ ފަދަ މަސައްކަތްތަކުގައި އެއްބާރުލުންދޭނޭކަމުގެ ޔަގީންކަންއަރުވާފަ އެވެ.

ދިވެހި ރައްޔިތުންނަށް ޒަމާނީ އޮންލައިން ޕޭމަންޓް ސިސްޓަމްތަކާއި އިލެކްޓްރޯނިކް ވޮލެޓްތައް (އީ-ވޮލެޓް) މެދުވެރިކޮށް މާލީ މުޢާމަލާތްތައް ފަސޭހަކަމާއެކު ކުރެވޭނެ މަގު ތަނަވަސްކޮށްދިނުމަކީ ރައީސް މުޢިއްޒުގެ ރިޔާސީ ވައުދުފުޅެކެވެ.

އެގޮތުން ރާއްޖެއަށް ޕޭޕަލްގެ ހިދުމަތް ތައާރަފުކުރުމަށްޓަކާ ބޭނުންވާ ޕްރޮޕޯސަލް މިދިޔަމަހުގެ ފަހުކޮޅު ރާއްޖޭގެ ފަރާތުން ޕޭޕަލް ކުންފުންޏަށް ވަނީ ހުށަހަޅާފަ އެވެ. ޕޭޕަލްއަކީ އޮންލައިންކޮށް ފައިސާ ފޮނުވާ ލިބިގަތުމަށް ފަހި ކޮށްދިނުމުގެ ގޮތުން ހަދާފައިވާ އެޕްލިކޭޝަނެއް ނުވަތަ އީ-ވޮލެޓެކެވެ.

ސަރުކާރުން ދަނީ ބައިނަލްއަގްވާމީ ފެންވަރުގައި އިތުބާރު ލިބިފައިވާ އެކި އީ-ވޮލެޓް ހިދުމަތްތައް ރާއްޖެއަށް ތައާރަފުކުރުމުގެ މަސައްކަތް ކުރަމުންނެވެ. މިކަމުގެ ސަބަބުން ގައުމުގެ މާލީ ނިޒާމް ހަރުދަނާވެ، ވިޔަފާރިތަކަށާއި އާންމު ރައްޔިތުންނަށް ފައިސާގެ މުއާމަލާތްތައް ކުރުމުގައި އިތުރު ލުއިފަސޭހަކަން ލިބިގެންދާނެކަމަށް ސަރުކާރުން ވިދާޅުވެ އެވެ.