ޕޯސްޓުތައް ހުތުރު ނަމަވެސް ވިދާޅުވީ؛ މިއަދުގެ މައުލޫން ބޭރު ކަމަށް!؟

އިބްރާހިމް އިމާދު

28 އޭޕްރީލް 2026 - 13:26

0 comments

ކްލައިމެޓް ޗޭންޖް މިނިސްޓަރުގެ މަގާމަށް މިފަހުން ރައީސް ޑރ. މުއިއްޒު އައްޔަން ކުރެއްވި އަލީ ޝަރީފު ސޯޝަލް މީޑިއާގައި ކުރިން ޝާއިއު ކުރެއްވި ހުތުރު ޕޯސްޓުތަކެއް އާންމުވެ، ދައުރުވާން ފެށިތާ ގިނަ އަހަރުތަކެއް ވެއްޖެ އެވެ. އެހެން އެކަން އޮތްވާ އަލީ ޝަރީފް މަގާމަށް އައްޔަން ކުރުމާ އެކު މިއަދު ވަނީ ފުރަތަމަ ފަހަރަށް ނޫސްވެރިންގެ "އަތްދަށު" ވެފަ އެވެ.

އަލީ ޝަރީފްގެ އޭރުގެ ޕޯސްޓުތައް ރައްދު ކުރެއްވި ބޭފުޅުންގެ ތެރޭގައި އޭނާއާ އެކު މިހާރު ކެބިނެޓުގައި ތިއްބަވާ ބައެއް ވަޒީރުންނާއި އިންޑިއާގެ ބޮޑުވަޒީރު މޯދީ އަދި ފްރާންސްގެ ރައީސް އެމަނުއެލް މެކޮން ހިމެނެ އެވެ. މޯދީއަކީ ޓެރަރިސްޓެއް ކަމަށް ސިފަކުރައްވާ އޭނާ ވަނީ 2020ގައި ޕޯސްޓެއް ކުރައްވައިފަ އެވެ.

އަލީ ޝަރީފު ކުރައްވާފައި ހުރި ޕޯސްޓުތަކުގެ ތެރޭގައި، ރައްޔިތުންގެ މަޖިލީހުގެ ކުރީގެ މެންބަރު އިބްރާހިމް އިސްމާއިލް (އިބްރާ) ގެ ނުކުޅެދުންތެރިކަމަށް ހަޖޫޖަހާފައި ހުރި ޕޯސްޓަކާއި ކުރީގެ ރައީސް މުހައްމަދު ނަޝީދަކީ ކާފަރެއް ކަމަށް ބުނެފައިވާ ޕޯސްޓަކާއި ބުރުގާ ނާޅާ އަންހެނުން އަމިއްލައަށް ފުރައްސާރައަށް މަރުހަބާ ކިޔާ ކަމަށް ބުނާ ޕޯސްޓެއް ހިމެނެ އެވެ.

"މީނާގެ ދެން ހުރި އަނގުނުތައް ސަލާމަތުން ﷲ ދެއްވީތީ މީނާ ޝުކުރުވެރިވާން އެބަޖެހޭ،" އިބްރާއަށް ނިސްބަތްކޮށް އަލީ ޝަރީފު ކުރެއްވި ޕޯސްޓެއްގައި ވިދާޅުވެފައިވެ އެވެ.

އޭގެ އިތުރުން އިންޑިއާގެ ބޮޑުވަޒީރު ނަރެންދުރަ މޯދީއަކީ ޓެރަރިސްޓެއް ކަމަށް ބުނާ ޕޯސްޓަކާއި ޑިމޮކްރަސީގެ ނިޒާމު ގަބޫލުނުކުރައްވާ ކަމަށް ބުނާ ޕޯސްޓަކާއި ބައެއް މީސްމިހުންނާ ދިމާލަށް ހުތުރު ބަހުން ވާހަކަ ދައްކާފައިވާ ޕޯސްޓުތަކެއް ވެސް އަލީ ޝަރީފު ކުރައްވާފައިވެ އެވެ.

އަލީ ޝަރީފުގެ ޕޯސްޓުތައް އަލުން އާންމުވުމުން އެ ޕޯސްޓުތަކަށް އާންމުންގެ ފާޑުކިޔުން ދަނީ އަމާޒުވަމުންނެވެ. އެގޮތުން، އޭނާ ކެބިނެޓަށް އައްޔަން ކުރުމުން ރައީސް މުހައްމަދު މުއިއްޒަށް ވެސް ބައެއް މީހުން ފާޑުކިޔާފައިވެ އެވެ.

"މިއީ ލަދުވެތި ކަމެއް، މުއިއްޒު. މިކަހަލަ އުރައްޕެއް ނެތް މީހުން ވަޒީރުކަމަށް ލީމާ ދެން ވެސް ވާނީ ފެއިލް،" އެކްސްގައި މީހަކު ކުރި ޕޯސްޓެއްގައި ބުނެފައިވެ އެވެ.

މަގާމާ ހަވާލުވެވަޑައިގަތުމަށް ފަހު މިނިސްޓަރު ބޭއްވެވި ފުރަތަމަ ނޫސްވެރިންގެ ބައްދަލުވުމުގައި އެފަދަ ޕޯސްޓުތަކެއް ކުރެއްވީ ކީއްވެތޯ އާއި ކޮންކަމަކާ ގުޅުވާފައިތޯ ނޫސްވެރިޔަކު ސުވާލުކުރުމުން އޭނާ ވިދާޅުވީ "މައުލޫން ބޭރު ވާހަކައެއް" ކަމަށްވާތީ ޖަވާބު ދެވެން ނެތް ކަމަށެވެ.

"ތިމެޓިކް އޭރިއާ އިން ބޭރު ސުވާލެއް އެއީ. އެހެންވީމާ އަޅުގަނޑު ކުރިން ވެސް ދިން ޖަވާބު ދެން ވެސް ދޭން އޮތީ،" އަލީ ޝަރީފް ވިދާޅުވި އެވެ.

އޭގެ ފަހުން ވެސް އެ ނޫސްވެރިޔާ ވަނީ ރައްޔިތުންގެ ކަންބޮޑުވުން އޮތް ކަމެއް ކަމަކަށް ވާތީ އެ ޕޯސްޓުތަކާއި ބަސްމަގު ގެންގުޅުއްވާފައިވާ ގޮތަށް މައާފަށް އެދިވަޑައިގަންނަވަންތޯ ސުވާލުކޮށްފަ އެވެ.

"އަނެއްކާވެސް މިއަދުގެ މައުލޫން ބޭރު ވާހަކައެއް އެއީ. ކުރިން ދަންނަވައިފި އަޅުގަނޑުގެ ބައެއް ކަހަލަ ބިލީފްތައް އެބަހުރި ހެއްޔޭ. ހަމަ އޭގެ ޖަވާބުގައި އަޅުގަނޑު ދަންނަވަން އޮތީ، ނޯ، އައިޑޯންޓް ބިލީވް މޯޑީ އިޒް އަ މޮންސްޓާ، އިނގޭ. އަނެއްކާވެސް އެވަރަށް އަޅުގަނޑު އޭގެ ޖަވާބު ބާއްވާފައި މިއަދުގެ މައުލޫން ބޭރު ސުވާލެއް ވީމާ އެހެން ފަރާތަކަށް ފުރުސަތު އަރުވާނަން،" އަލީ ޝަރީފް ވިދާޅުވި އެވެ.