ދެ ރަށަކަށް އެފްއެސްއެމްއިން ވިއްކި ތެލުގައި ފެން ހުރި ވާހަކަ ދޮގުކޮށްފި

އަހުމަދު ނިހާން

16 ޖުލައި 2024 - 15:33

0 comments

ފިއުލް ސަޕްލައި މޯލްޑިވްސް (އެފްއެސްއެމް) އިން ގއ. މާމެންދު އާއި ނިލަންދު އަށް ވިއްކި ތެލުގައި ފެން ހުރި ކަމަށް ބުނެ ސޯޝަލް މީޑިއާގައި ދައުރުކުރަމުންދާ ވާހަކަތައް އެ ކުންފުނިން މިއަދު ދޮގުކޮށްފި އެވެ.

އެފްއެސްއެމް އިން އިއްޔެ ނެރުނު ނޫސްބަޔާނެއްގައި ބުނީ އެ ކުންފުނިން ވިއްކި ތެލުގައި ގިނަ އަދަދަކަށް ފެން ހުރި ކަމަށް މީސްމީޑިއާ ގައި ދައުރުވަމުންދާ ހަބަރަކީ ދޮގު ހަބަރެއްކަމަށެވެ. އެ ކުންފުނިން ވިއްކާ ތެލަކީ ފެންވަރު ރަނގަޅު ތެޔޮކަން ޔަގީން ކޮށްދިނުމަށް ފެނަށް ޓެސްޓު ކުރެވޭނެ އިންތިޒާމު ވެސް އެ ކުންފުނީގެ ބާޖުތަކުގައި ހުންނާނެ ކަމަށް ވެސް ބަޔާނުގައި އެފްއެސްއެމް އިން ބުންޏެވެ.

އޭގެއިތުރުން، ތެލުގެ ކޮލިޓީ ދެމެހެއްޓުމަށް ތެޔޮ ވިއްކާ ފަރާތްތަކުން، އެކަމަށް ހެދިފައިވާ ގަވާއިދުތަކާ އެއްގޮތަށް ތެޔޮ ރައްކާކުރާ އިންތިޒާމްތައް ތަރައްގީކޮށް، ކަމާ ބެހޭ ފަރާތްތަކުގެ ލަފައާއި އެއްގޮތަށް އަމަލު ކުރުމަށް އެ ކުންފުނިން ވަނީ އިލްތިމާސްކޮށްފަ އެވެ.

ނިމިދިޔަ މެއި މަހު އެސްޓީއޯއިން ވަނީ ދުނިޔޭގެ ބާޒާރުގައި ތެޔޮ ގަންނަން ލިބޭ އަގު ހެޔޮވުމާ ގުޅިގެން ތެޔޮ ވިއްކާ އަގު ހެޔޮކޮށްފައެވެ. އެހެންވެ، މިހާރު އެފްއެސްއެމްގެ ސްޓޭޝަންތަކުން ޕެޓްރޯލް ލީޓަރެއް 13.98 ރުފިޔާއަށް އަދި ޑީސަލް ލީޓަރެއް 13.92 ރުފިޔާއަށް ލިބޭނެ އެވެ.