މެޑިކަލް ސްކޫލުގައި ކިޔެވުމަށް އެއް ގައުމަކުން 500 އެޕްލިކޭޝަން!

ހަސަން ހަލީމް

26 ނޮވެމްބަރ 2024 - 23:25

0 comments

އެމްއެންޔޫގައި ޑޮކްޓަރުކަން ކިޔަވައިދިނުން - ފޮޓޯ/ އެމްއެންޔޫ

ގައުމީ ޔުނިވާސިޓީ (އެމްއެންޔޫ)ގައި ގާއިމް ކޮށްފައިވާ މެޑިކަލް ސްކޫލްގައި ކިޔަވަން، ބޭރު ގައުމަކުން 500 ރިކުއެސްޓް ލިބުނު ކަމަށް ހަޔާ އެޑިޔުކޭޝަން މިނިސްޓްރީން މިއަދު ބުނެފި އެވެ.

ދައުލަތުގެ މީޑިއާގައި ވާހަަކަދައްކަވަމުން ހަޔާ އެޑިޔުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ނަޒީރު ވިދާޅުވީ ދިވެހިން މަތީ ތައުލީމު ހާސިލްކުރުމަށް ރާއްޖެއިން ބޭރަށްދާ އުސޫލުން ބޭރު ގައުމުތަކުގެ ކުދިން ރާއްޖޭގައި ކިޔެވުމަށް ބޭނުންވާ ހުށަހަޅާ އަދަދުވެސް އިތުރުވަމުންދާ ކަމަށެވެ. އެގޮތުން މެޑިކަލް ސްކޫލުގެ ޖެނުއަރީ އިންޓޭކުގައި ކިޔެވުމަށް އެއް ގައުމަކުން 500 އެޕްލިކޭޝަން ލިބުނު ކަމުގައި ވިދާޅުވި އެވެ. ނަމަވެސް އެއީ ކޮން ގައުމެއް ކަމެއް ވިދާޅުވެފައެއް ނުވެ އެވެ.

ނަޒީރު ވިދާޅުވީ މެޑިކަލް ސްކޫލަކީ އަދި ފަށައިގެންތާ މާގިނަ އަހަރުތަކެއް ވެފައިވާ ތަނަކަށް ނުވާތީ އެތަނަށް ޖާގައާއި ވަސީލަތުގެ ދަތިކަން މިވަގުތު އެބަހުރި ކަމަށެވެ. އެހެންކަމުން މިވަގުތު މެޑިކަލް ސްކޫލުގައި ޖާގަ ދެވެން އޮތީ ހަމައެކަނި ދިވެހިންނަށް ކަމަށް ވިދާޅުވި އެވެ.

"ރާއްޖޭގެ ދަރިވަރުންގެ ޑިމާންޑުވެސް މެޑިކަލް ސްކޫލުގެ ކޯސްތަކަށް ވަރަށް ބޮޑު،" ނަޒީރު ވިދާޅުވި އެވެ. ރާއްޖޭގެ މެޑިކަލް ސްކޫލްގައި ކިޔަވަން ރިކުއެސްޓްކުރީ ކޮން ގައުމަކުން ކަމެއް ނަޒީރު ވިދާޅެއް ނުވެ އެވެ.

މި މަސައްކަތުގެ ތެރެއިން އެ ދަރިވަރުންނަށް ބޭނުންވާނެ އެކޮމޮޑޭޝަންތައް ރާއްޖޭގެ ފަސް ރަށެއްގައި އަޅާނެ ކަމަށާއި، މިހާރު އެ ރަށްތައް ވެސް ހުރީ ކަނޑައަޅައިފައި ކަމަށް ނަޒީރު ވިދާޅުވިއެވެ. އޭގެ ތެރޭގައި ހުޅުމާލޭގެ އިތުރުން، ހއ. ދިއްދުއާއި ރ. އަލިފުށި އަދި ގއ. ވިލިނގިލި ހިމެނެއެވެ.

މީގެ އިތުރުން އަމިއްލަ ގެތަކުގައި ބޭރު ގައުމުތަކުގެ ދަރިވަރުން ކިޔެވުމަށް ބެއިތިއްބޭނެ ނިޒާމެއް ގާއިމް ކުރުމަށް ޓަކައި ބޭނުންވާ ގާނޫނެއް ވެސް ވުޖޫދުކުރަންޖެހޭ ކަމަށް އޭނާ ވިދާޅުވިއެވެ.

ސްކޫލް އޮފް މެޑިސިން ރާއްޖޭގައި ގާއިމްކޮށް ކިޔަވައިދޭން ފެށީ 2019ވަނަ އަހަރެވެ. ރާއްޖޭގައި މެޑިސިން ކިޔަވައިދެނީ މެލޭޝިއާގެ ގައުމީ ޔުނިވާސިޓީ، ކެބަންސާން މެލޭޝިއާ (ޔޫކޭއެމް)ގައި ކިޔަވައިދޭ ކަރިކިއުލަމަށެވެ.

ފަސް އަހަރަށް ދެމިގެންދާ އެ ކޯހުގެ، އެމްއެންޔޫގެ ފުރަތަމަ ބެޗު މިދިޔަ މަހު ވަނީ ދަސްވެނިވެފައެވެ.