މަތީ ތައުލީމުގެ ހުރިހާ އިމްތިހާނަކުން 50ޕަސަންޓް ފާސްވާންޖެހޭގޮތަށް ހަދަނީ

އިސްމާއިލް ރިޒާ

22 ސެޕްޓެމްބަރ 2024 - 11:00

0 comments

މަތީ ތައުލީމަށް ކިޔަވާ ދަރިވަރުން ހަދާ ކޯސްތަކުގެ ހުރިހާ އިމްތިހާނަކުން 50 އިންސައްތަ ފާސްވެގެން ނޫނީ ކޯހުން ފާސްނުވެވޭ ގޮތަށް ނިންމައިފި އެވެ.

މޯލްޑިވްސް ކޮލިފިކޭޝަން އޮތޯރިޓީ، އެމްކިއުއޭގެ އެކްރިޑޭޝަން އުޞޫލަށް ގެނައުމަށް ނިންމާފައިވާ ބަދަލުތަކާއި ގުޅޭގޮތުން ދައުލަތުގެ ޓީވީއަށް ދެއްވި އިންޓަވިއުއެއްގައި އެއޮތޯރިޓީގެ ސީއީއޯ ފިޒާނާ ރަޝީދު ވިދާޅުވީ ކޯސްތަކުގައި ދަރިވަރުންނަށް ހަވާލުކުރާ އެސައިމަންޓްތައް އެހެން މީހުން ލައްވާ ތައްޔާރުކުރުމަކީ މައްސަލައެއްކަމަށެވެ.

މިފަދަ މައްސަލަތަކަށް ހައްލެއް ހޯދިނުމުގެ ގޮތުން މަތީ ތަޢުލީމް މަރުކަޒުތަކުން ހިންގާ ކޯސްތަކުގެ އިމްތިހާންތަކުން %50 ފާސްވެގެން ނޫންގޮތެއްގައި އެ ކޯހުން ފާސް ނުވެވޭގޮތް ހެދުމަށް ނިންމާފައިވާކަމަށް ފިޒާނާ ވިދާޅުވިއެވެ. އަދި އެ އުޞޫލު ވަރަށް އަވަހަށް ގެޒްޓްކުރާނެކަމަށްވެސް ފިޒާނާ ވިދާޅުވިއެވެ. އެމްކިއުއޭގެ ސީއީއޯ ވިދާޅުވީ އެ ބަދަލު ގެނައުމަށް ނިންމާފައިވަނީ މަތީ ތަޢުލީމްދޭ މަރުކަޒުތަކުގެ އިސްވެރިންނާ ބައްދަލުކޮށް މަޝްވަރާކުރެއްވުމަށް ފަހުގައިކަމަށެވެ.

އޭނާ ވިދާޅުވީ މި ބަދަލުގެ ސަބަބުން އެސައިންމަންޓް ގަތުމުގެ ބައިވެސް ކުޑަވެގެން ދާނެ ކަމަށެވެ.

ބައެއް ތައުލީމީ މަރުކަޒު ތަކުގައި ހަމައެކަނި އެސައިންމަންޓުން މަތީ މާކްސް ލިބިގެންވެސް މުޅި ކޯހުން ފާސްވުމުގެ ފުރުސަތު ލިބެ އެވެ. ގިނަ ހާލަތްތަކުގައި މި އެސައިންމަންޓުތައް ފުރިހަމަކުރަނީ އަގު ދީގެން ނުވަތަ އެހެން މީހަކު ލައްވަ އެވެ. ނަމަވެސް އެއީ ދަރިވަރު 5000 ރުފިޔާއިން ޖޫރިމަނާކޮށް، ދަރިވަރާ ދެކޮޅަށް ފިޔަވަޅު އެޅުމުގެ ހައްގު ތައުލީމީ މަރުކަޒަށް ލިބިގެންދާ ބޮޑު ކުށެކެވެ.