ގޯތި ލިބިފައިވާ މަރުވެފައިވާ މީހުންގެ ބިންތައް ވާރިސުންނަށް ދެނީ

އަހުމަދު ނިހާން

13 އޯގަސްޓް 2024 - 13:27

0 comments

ހުޅުމާލެއިން މާލޭ މީހުންނަށް ދޭ ގޯއްޗެއް އެ ގޯތި ލިބުނު މީހާއާ ހަވާލުކުރަނީ. ފޮޓޯ: ހައުސިން މިނިސްޓްރީ

ކުރީ ސަރުކާރުން ހިންގި "ބިންވެރިޔާ" ސްކީމްގެ ދަށުން ގޯތި ލިބިފައިވާ މީހުންގެ ތެރެއިން މިހާރު މަރުވެފައިވާ މީހުންގެ ބިންތައް ވާރިސުންނަށް ދިނުމަށް ހައުސިން މިނިސްޓްރީން މިއަދު ހުޅުވާލައިފި އެވެ.

ހައުސިން މިނިސްޓްރީން މިއަދު ކުރި އިއުލާނެއްގައި ބުނީ، ބިންވެރިޔާ ސްކީމްގެ ދަށުން ބިން ލިބިފައިވާ ފަރާތްތަކުގެ ތެރެއިން އެޕްލިކަންޓެއް ނުވަތަ އެޕްލިކަންޓް މަރުވެފައިވާ ފަރާތްތަކުން ޝަރުއީ ކޯޓުން ވާރިސުން ސާބިތުކުރަން ޖެހޭނެ ކަމަށެވެ. އެއަށް ފަހު ގަޒިއްޔާ ނިމުނު ގޮތުގެ ރިޕޯޓު މިނިސްޓްރީގެ ހިޔާވެހި ޕޯޓަލަށް ހުށަހަޅައި އެޕޮއިންޓްމަންޓަށް އެދުމުން އެއްބަސްވުމުގައި ސޮއިކުރުމުގެ އިންތިޒާމު ހަމަޖައްސައިދެއްވާނެ ކަމަށް މިނިސްޓްރީން ބުންޏެވެ.

ހައުސިން މިނިސްޓްރީން ކުރިން ބުނެފައިވާ ގޮތުގައި، ބިން ލިބުނު ފަހުން 12 މީހަކު މަރުވެފައިވެ އެވެ.

ބިންވެރިޔާ ސްކީމްގެ ދަށުން މާލޭ މީހުންނަށް ހުޅުމާލެ އާއި ގުޅިފަޅު އަދި ގިރާވަރުފަޅު ހިމެނޭ ގޮތަށް 9،000 އަށް ވުރެ ގޯތި ދޫކުރަން ވަނީ ނިންމައިފަ އެވެ.

ކުރީ ސަރުކާރުން ގޯތި ދޭން ނިންމާފައި ވަނީ ހުޅުމާލެ، ގުޅިފަރު އަދި ގިރާވަރުފަޅުންނެވެ. ގުޅިފަޅުން 2،218 ގޯތި ކަނޑަން ނިންމާފައިވެ އެވެ. އަދި، ހުޅުމާލެ ދެވަނަ ފިޔަވަހިން 1407 ގޯއްޗާއި ހުޅުމާލޭގެ ތިންވަނަ ފިޔަވަހިން 699 ގޯތި ދޭން ނިންމާފައިވެ އެވެ.

ހައުސިން މިނިސްޓަރު ޑރ. އަލީ ހައިދަރު އިއްޔެ ރައްޔިތުންގެ މަޖިލީހުގައި ވިދާޅުވީ، ހުޅުމާލެ ދެވަނަ ފިޔަވަހިން ދޭންޖެހޭ ހުރިހާ ގޯއްޗެއް އޮކްޓޯބަރު މަހުގެ ނިޔަލަށް ހަވާލުކުރެވޭނެ ކަމަށެވެ.

ހައިދަރު ވިދާޅުވި ގޮތުގައި، ހުޅުމާލެ ދެވަނަ ފިޔަވަހިން ބިންތައް ދޫކޮށްފައިވަނީ މަގުތަކަށް އަރާ ގޮތަށާއި އެކި ކުންފުނިތަކުން ސާމާނުތައް ބަހައްޓާފައި ހުރި ސަރަޙައްދުތަކުންނެވެ. އަދި، ބައެއް ގޯތިތައް ކަނޑުންނާއި ފަޅުން ވެސް ދީފައިވާއިރު، އެއީ ގޯތީގެ ގޮތުގައި ނުބެލޭނެ ކަމަށް އޭނާ ވިދާޅުވި އެވެ.