ސަރުކާރު ބަންދުކުރިޔަސް މާދަމާ ބޭންކުތަކުން ހިދުމަތް ލިބޭނެ

ހަސަން ހަލީމް

14 އޯގަސްޓް 2024 - 00:23

0 comments

މާދަމާ އަކީ ސަރުކާރު ބަންދު ދުވަހަކަށް ވިޔަސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭންކްތައް ހުޅުވުމަށް ނިންމާފައިވާތީ، މާދަމާ ބީއެމްއެލް އަދި އެމްއައިބީ ރަސްމީ ދުވަހެކޭ އެއްގޮތަށް ހިދުމަތް ދިނުމަށް ނިންމާފި އެވެ.

މުޅި ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން ފެންބޮޑުވެ، ރައްޔިތުންނަށް ބޭރަށް ނުކުމެ އުޅުން އުނދަގޫވެފައިވާތީ ރައީސް، ޑރ. މުހައްމަދު މުއިއްޒު މިރޭ ވަނީ މާދަމާއަކީ ސަރުކާރު ބަންދު ދުވަހެގެ ގޮތުގައި ކަނޑައަޅުއްވައިފަ އެވެ.

ބީއެމްއެލްއިން ބުނީ ސަރުކާރު ބަންދު ދުވަހަކަށް ވިޔަސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭންކްތައް ހުޅުވުމަށް ނިންމާފައިވާތީ، މާދަމާ ބީއެމްއެލްއިން ރަސްމީ ދުވަހެކޭ އެއްގޮތަށް ހިދުމަތް ދިނުމަށް ނިންމާފައިވާ ކަމަށެވެ.

މީގެ އިތުރުން އެމްއައިބީގެ މީޑިއާ މެނޭޖާ އަހުސަން ޖަމީލް ވިދާޅުވީ ކުރިއެކޭ އެއްގޮތަށް މާދަމާ ވެސް އެމްއައިބީގެ ހުރިހާ ހިދުމަތެއް ލިބޭނެކަމަށެވެ.

ރައީސް އޮފީހުގެ އިސް ތަރުޖަމާނު ހީނާ ވަލީދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ސަރުކާރު އޮފީސްތައް ބަންދު ކުރަން ރައީސް ނިންމެވީ ރާއްޖޭގެ ވަރަށް ގިނަ ރަށްތަކަށް ބޯކޮށް ވާރޭވެހި މޫސުން ގޯސްވުމުގެ ސަބަބުން، ކިޔަވާ ކުދިންނާއި ވަޒީފާ އަދާކުރާ މީހުންނަށް ވެސް ދަތުރުފަތުރުކުރުމާއި ހިނގާބިނގާވާން ދަތިވާނެތީ ކަމަށެވެ.