ތައިލެންޑުގެ އާ ބޮޑުވަޒީރަށް ރައީސް މަރުޙަބާ ވިދާޅުވެއްޖެ

ހަސަން ހަލީމް

18 އޯގަސްޓް 2024 - 13:06

0 comments

ތައިލެންޑުގެ ބޮޑުވަޒީރުކަމަށް އިންތިހާބުކުރި ޕައޭޓޮންޓާން ޝިނަވަޓްރާ. -- ފޮޓޯ: އޭއެފްޕީ

ތައިލެންޑުގެ ބޮޑުވަޒީރުކަމަށް އަލަށް އިންތިހާބުވެވަޑައިގެންނެވި ޕައޭޓޮންޓާން ޗިނަވާތުއަށް ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ.

ތައިލެންޑުގެ ބޮޑުވަޒީރު ކަމަށް ކުރީގެ ބޮޑުވަޒީރު ތަކްސިން ޝިނަވަޓްރާގެ ޒުވާން ދަރިކަނބަލުން ޕައޭޓޮންޓާން އެ ގައުމުގެ ގާނޫނު ހަދާ މަޖިލީހުން އިއްޔެ ވަނީ އިންތިހާބުކޮށްފަ އެވެ.

ބިލިއަނަރު ތަކްސިންގެ ދަރިކަނބަލުންގެ އުމުރުން އަދި 37 އަހަރެވެ. އެހެންވެ އޭނާ ވެފައިވަނީ ތައިލެންޑުގެ އެންމެ ޒުވާން ބޮޑުވަޒީރަށެވެ. އަދި އޭނާ އަކީ ގައުމުގެ ދެ ވަނަ އަންހެން ބޮޑުވަޒީރެވެ. އެންމެ ފުރަތަމަ އަންހެން ބޮޑުވަޒީރަކީ ޕައޭޓޮންޓާންގެ ބޮޑުދައިތައެއް ކަމަށްވާ ޔިންގްލަކް އެވެ. ޢެއީ ތަކްސިންގެ ކޮއްކޮ އެވެ.

ތައިލެންޑުގެ އާ ބޮޑުވަޒީރު ޕައޭޓޮންޓާން ޗިނަވާތު އިންތިހާބުކޮށްފައިވަނީ އެ މަގާމުގައި ހުންނެވި ފިޔު ތައި ޕާޓީގެ ސެއްތާ ތަވީސިން ގާނޫނުއަސާސީއާ ހިލާފުވެފައިވާ ކަމަށް ކަނޑައަޅައި މަގާމުން ދުރު ކުރުމުންނެވެ.
ރައިސް ޑރ. މުހައްމަދު މުއިއްޒު ވިދާޅުވީ، އެކަމަނާގެ ދައުރުގައި ތައިލެންޑަށް އުޖާލާ މުސްތަގުބަލެއް އޮތް ކަމަށެވެ. އަދި ކުރިއަށް އޮތްތަނުގައި ދެ ގައުމުގެ ގުޅުން ވަރުގަދަކޮށް ގުޅިގެން މަސައްކަތްކުރެއްވުމަށް އުއްމީދު ކުރައްވާކަމަށް ރައީސް ވިދާޅުވި އެވެ.