ފިޗުން ރާއްޖޭގެ ކްރެޑިޓު ރޭޓިން ސީސީއަށް ދަށްކޮށްފި

އަހުމަދު ނިހާން

29 އޯގަސްޓް 2024 - 13:48

0 comments

ދުނިޔޭގެ އެންމެ ބޮޑު އެއް ކްރެޑިޓް ރޭޓިން އެޖެންސީ، ފިޗް ރޭޓިންސް އިން ރާއްޖޭގެ ރޭޓިން އަނެއްކާވެސް ދަށްކޮށް "ސީސީ" ރޭޓިން އެއް ދީފި އެވެ.

އެންމެ ފަހުން ފިޗުން ރާއްޖޭގެ ރޭޓިން ދަށްކުރީ މިދިޔަ ޖޫން މަހުގެ ތެރޭގަ އެވެ. އެ ފަހަރު ފިޗުން ވަނީ ފާއިތުވި ދެ އަހަރު "ބީ ނެގެޓިވް" ގައި ހުރި ރޭޓިން "ސީސީސީ ޕްލަސް" އަށް ދަށްކޮށްފަ އެވެ.

އާންމުކޮށް ފިޗުން ރޭޓިންއަށް ބަދަލުގެންނަނީ ނޫނީ "ރޭޓިން ރިވިޝަން" ގެންނަނީ އަހަރަކު އެއް ފަހަރެވެ. މިއީ މިހާ ކައިރިކައިރީގައި ޑައުންވާޑް ރޭޓިން ރިވިޝަނެއް ގެނައި ފުރަތަމަ ފަހަރު ކަން ވެސް ފާހަގަކޮށްލެވެ އެވެ.

ފިޗް އިން ބުނީ މިދިޔަ މެއި މަހު 494 މިލިއަން ޑޮލަރުގައި ހުރި ބޭރު ފައިސާގެ ރިޒާވް، ޖުލައި މަހާ ހަމައަށް 395 މިލިއަން ޑޮލަރަށް ދަށްވެފައިވާ ކަމަށެވެ.

ފިޗުން ރޭޓިން ދަށްކުރި ސަބަބުތަކުގެ ތެރޭގައި:

ރާއްޖޭގެ ރިޒާވުތައް އިންތިހާއަށް ދަށްވުން
ދަައްކަން ހުރި ބޮޑެތި ބޭރުގެ ދަރަނިތައް ހުރުން
ބޭރު ފައިސާގެ ދަތިކަން ކުރިއަށް އޮތް ދުވަސްތަކުގެ ތެރޭގައި ވެސް ދެމިއޮތުން
ރާއްޖޭން އިމްޕޯޓަށް ކުރާ ހަރަދުތައް ކުރިއަށް އޮތް ތަނުގައި ވެސް އިތުރުވުން
ޑޮލަރުގެ ބޮޑު ތާށީކަމެއް އައިސް ޕެރެލަލް މާކެޓް (ކަޅު ބާޒާރާއި) ރަސްމީ ރިޒާވަށް ވެސް ޕްރެޝަރު އޮތުން
ބޭރު ގައުމުތަކުން އެހީ ލިބޭނެ ކަމުގެ އެއްވެސް ޔަގީންކަމެއް ނެތުން

ކުރީގެ ސަރުކާރުތަކުން ނަގާފައިވާ ލޯނުތަކުގެ ސަބަބުން، އަންނަ އަހަރު ޖުމްލަ 500 މިލިއަން ޑޮލަރު އަނބުރާ ދައްކަން ޖެހޭ ކަމަށް ފިނޭންސް މިނިސްޓްރީން ވަނީ ބުނެފަ އެވެ. އޭގެ އިތުރުން 2026 ވަނަ ދައްކަން ޖެހޭ ދަރަނީގެ ޖުމްލަ އަދަދު އެއް ބިލިއަން ޑޮލަރަށް އަރާނެ ކަމަށް ބުނެފައިވެ އެވެ.

އެއާ އެކު، ރާއްޖޭން އެންމެ ބޮޑު ދަރަންޏެއް ނަގާފައިވާ ޗައިނާ އާއި އިންޑިއާ އިން ލޯނު އަނބުރާ ދެއްކުން ފަސްކުރުމުގެ މަޝްވަރާތައް ވެސް ސަރުކާރުން ދަނީ ކުރަމުންނެވެ.