އާ ޕީޖީއަކު އައްޔަންކުރަން ބާއްވާ ދައުރުން ބޭރު ޖަލްސާ ބުދަ ދުވަހުގެ ރޭ

އަހުމަދު ނިހާން

09 ސެޕްޓެމްބަރ 2024 - 13:23

0 comments

ޕްރޮސެކިއުޓާ ޖެނެރަލް (ޕީޖީ) ގެ މަގާމަށް ބޭފުޅަކު އައްޔަން ކުރުމަށް އަންނަ ބުދަ ދުވަހު ދައުރުން ބޭރުން ރައްޔިތުންގެ މަޖިލީހުގެ ޖަލްސާއެއް ބާއްވަން ނިންމައިފި އެވެ.

ޕީޖީގެ މަގާމުގައި ހުންނެވި ހުސައިން ޝަމީމް އެ މަގާމުން އިސްތިއުފާ ދެއްވީ މިދިޔަ މަހު 22 ގަ އެވެ.

ޕްރޮސެކިއުޓާ ޖެނެރަލްގެ މަގާމު އުފެއްދީއްސުރެން އެއްވެސް ޕީޖީއަކަށް ފަސް އަހަރުގެ ދައުރެއް ފުރިހަމަކުރެވިފައެއް ނުވެ އެވެ. ޝަމީމް އެ މަގާމުގައި ހުންނެވީ ހަތަރު އަހަރާއި އަށް މަހާއި ހަ ދުވަހު އެވެ. ދައުރު ފުރިހަމަކުރުމާ އެންމެ ގާތްކުރީ ވެސް އޭނާ އެވެ.

މިހާތަނަށް ޕީޖީގެ މަގާމު ފުރުއްވި ބޭފުޅުންނަކީ ހުސައިން ޝަމީމްގެ އިތުރުން އައިޝަތު ބިޝާމް، މުހުތާޒު މުހުސިން އަދި އަހުމަދު މުއިއްޒެވެ.

ޕީޖީއަކު އައްޔަން ކުރުމަށް ގާނޫނުގައި ބުނާ މުއްދަތު މި މަހުގެ 21 އަށް ހަމަވާނެ އެވެ. އެހެންވެ، އޭގެ ކުރިން ދައުރުން ބޭރު ޖަލްސާތަކެއް ބާއްވައި އެކަން ނިންމާނެ ބެލެވެ އެވެ.

"ދެ ޖަލްސާއެއް ބާއްވާނެ. އެއް ޖަލްސާ ބުދަ ދުވަހު ބާއްވާ ގޮތަށް މިހާރު ހަމަޖެހިފަ އޮތީ،" ޕީޕީއެމްގެ ޕީޖީ ފަލާހު ބައެއް މީޑިއާ ތަކަށް ވިދާޅުވި އެވެ.