އަންނަ އަހަރަށް ހުށަހެޅި ދައުލަތުގެ ބަޖެޓުގެ ބަހުސް ނިންމާލައިފި

އަލީ ރާޒީ

19 ނޮވެމްބަރ 2024 - 22:39

0 comments

ރައްޔިތުންގެ މަޖިލީހަށް ދައުލަތުން ހުށަހަޅާފައިވާ 56.6 ބިލިއަން ރުފިޔާގެ ބަޖެޓަށް މެންބަރުންގެ މެދުގައި ބަހުސްކޮށް މިރޭ ނިންމާލައިފި އެވެ.

މަޖިލީހަށް ބަޖެޓް ހުށަހަޅާފައިވަނީ މިދިޔަ މަހުގެ 31 ވަނަ ދުވަހު އެވެ.

ބަޖެޓްގެ ހަރަދު 49.2 ބިލިއަން ރުފިޔާއަށް އަރާނެ ކަމަށް ލަފާކޮށްފައިވާއިރު އޭގެ ތެރެއިން 35.9 ބިލިއަން ރުފިޔާއަކީ ރިކަރަންޓް ހަރަދެވެ. 13.3 ބިލިއަން ރުފިޔާއަކީ ކެޕިޓަލް ހަރަދެވެ.

ޓެކްސް އާމްދަނީގެ ގޮތުގައި އަންނަ އަހަރު 29.2 ބިލިއަން ރުފިޔާ ޓެކްސް ނޫން އާމްދަނީގެ ގޮތުގައި އަށް ބިލިއަން އަދި ހިލޭ އެހީގެ ގޮތުގައި އަންނަ އަހަރު 2.6 ބިލިއަން ރުފިޔާ ލިބޭނެ ކަމަށް ވަނީ އަންދާޒާކޮށްފަ އެވެ.

ބަޖެޓަށް ކުރިއަށްގެންދިޔަ ބަހުސްގައި ކޮންމެ މެންބަރަކަށްވެސް، 15 މިނެޓުގެ ފުރުސަތެއް ވަނީ ދީފަ އެވެ. މި ބަހުސްގައި 77 މެންބަރުން ވާހަކަދައްކަވާފައިވެއެވެ. ބަހުސްގައި ޖުމްލަ ހޭދަވެފައިވަނީ 14 ގަޑިއިރާއި 17 މިނެޓެވެ.

އަންނަ އަހަރުގެ ބަޖެޓު މަޖިލީހަށް ހުށަހެޅީ މިދިޔަ މަހުގެ 31 ގަ އެވެ. އޭގެ ފަހުން މި މަހު 4 ގައި ބޭއްވި ބަޖެޓު ކޮމެޓީ ބައްދަލުވުމުގައި ވަނީ މި މަހު 20 އަށް ބަޖެޓު ދިރާސާކޮށް ނިންމަން ވެސް ކަނޑައަޅައިފަ އެވެ.

ވެރިކަން ހިންގާ ޕީއެންސީގެ މެންބަރުން ބުނީ އަންނަ އަހަރަށް ލަފާކޮށް ހުށަހަޅާފައިވާ ބަޖެޓަކީ ވަރަށް ރަނގަޅު ބަޖެޓެއް ކަމަށެވެ. ނަމަވެސް އިދިކޮޅު އެމްޑީޕީގެ މެންބަރުން ވަނީ ބަޖެޓަށް ވަރަށް ބޮޑަށް ފާޑުކިޔަމުންނެވެ.