މެންބަރަކު ޕާޓީ ބަދަލުކޮށްފިނަމަ ގޮނޑި ގެއްލޭ ގޮތަށް ގާނޫނުއަސާސީ އިސްލާހުކުރަނީ

އަހުމަދު ނިހާން

19 ނޮވެމްބަރ 2024 - 21:51

0 comments

ރައްޔިތުންގެ މަޖިލީހުގެ މެންބަރުން އިންތިޚާބުވި ޕާޓީ ބަދަލުކޮށްފި ނަމަ، މެންބަރުކަމުގެ ގޮނޑި ގެއްލޭ ގޮތަށް ގާނޫނުއަސާސީ އިސްލާހުކުރަން މާދަމާ ރައްޔިތުންގެ މަޖިލީހަށް ހުށަހަޅަން ސަރުކާރު ހިންގާ ޕީއެންސީން މިއަދު ނިންމައިފި އެވެ.

އެނގިފައިވާ ގޮތުގައި ޕާޓީ ބަދަލުވުމުން މެމްބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް އިސްލާހު ހުށަހެޅުމަށް ޕީއެންސީން ތައްޔާރުވަމުން އައި ނަމަވެސް މިހާތަަނަށް އެކަން ބައެެއް މެމްބަރުންނަށް އަންގައިފައެއް ނުވެ އެވެ. މިހާތަނަށް މާދަމާގެ އެޖެންޑާގައި ވެސް މިކަން ހިމަނާފައެއް ނެތެވެ.

އެންޓި ޑިފެކްޝަން ގާނޫނުގެ ނަމުގައި އަމަލުކުރަން ފެށި މި ގާނޫނަކީ ހަމަޖެހޭ ގޮތަކަށް އެކުލަވާލާފައިވާ ގާނޫނެއް ނޫން ކަމަށް ބުނެ ނިމިދިޔަ އެމްޑީޕީގެ ވެރިކަމުގައި ވަނީ އެ ގާނޫނު އުވާލާފަ އެވެ.

ނަމަވެސް ނިމިގެން ދިޔަ 19 ވަނަ ރައްޔިތުންގެ މަޖިލީހުގެ އެންމެ ފަހު ދައުރު އެމްޑީޕީގެ ބާރަށު ދާއިރާގެ އޭރުގެ މެންބަރު އަހްމަދު އަބްދުﷲ ވަނީ އެންޓި ޑިފެކްޝަން ގާނޫނެއް އަލުން މަޖިލީހަށް ހުށަހަޅާފަ އެވެ.

އެމްޑީޕީން އޭރު އެ ގާނޫނު މަޖިލީހަށް ހުށަހަޅާ ފާސްކުރީ އެމްޑީޕީގެ ގިނަ އަދަދެއްގެ މަޖިލިސް މެންބަރުން ޕީއެންސީއަށް ބަދަލުވުމާ ގުޅިގެން އެކަން ހުއްޓުވުމަށެެވެ.

މިދިޔަ 19 ވަނަ މަޖިލީހުގެ ފަހުކޮޅު ފާސްކުރި އެންޓި ޑިފެކްޝަން ގާނޫނު މިހާރު އޮންނަ ގޮތުން ތިން ހާލަތެއްގައި ގޮނޑި ގެއްލޭނެއެވެ. އެއީ؛

އިންތިޚާބުވި ޕާޓީން އަމިއްލައަށް ވަކިވުން
އިންތިޚާބުވި ޕާޓީ ނޫން އެހެން ޕާޓީއެއްގެ ދަފުތަރުގައި ޖެހުން [ޕާޓީ ބަދަލުކުރުން]
އަމިއްލަގޮތުން އިންތިޚާބުވާ މެންބަރަކު ޕާޓީއަކަށް ސޮއިކުރުން

މި ތިން ހާލަތުން ކުރެ ހާލަތެއް މެދުވެރިވެއްޖެ ނަމަ އިހުތިޔާރީކަމެއްގެ ގޮތަށް ހަތް ދުވަސް ތެރޭގައި އިސްތިއުފާ ދޭން ޖެހޭނެ ކަމަށް ބަޔާންކޮށްފައިވާއިރު، އިސްތިއުފާ ނުދީފި ނަމަ ވާނެ ގޮތެއް ނުވަތަ އެޅޭނެ ފިޔަވަޅެއް ބަޔާންކޮށްފައެއް ނެތެވެ.

އެ މައްސަލަ އަމިއްލަ ފަރާތަކުން އިއްޔެ ވަނީ ހައިކޯޓަށް ވެސް ހުށަހަޅާފައެވެ.

އެ ގާނޫނަށް ގެނައި އިސްލާހުގެ ދަށުން މެންބަރަކު ޕާޓީއަކުން ވަކިކޮށްފި ނަމަ ހަތް ދުވަސް ތެރޭގައި އެ މައްސަލަ ކޯޓަށް ހުށަހެޅުމުގެ ފުރުސަތު ވެސް ވަނީ ހިމަނައިފަ އެވެ. އަދި އިސްތިއުފާ ދޭން ޖެހޭ ހާލަތްތަކަށް މަޖިލިސް މެންބަރުންގެ އިތުރުން ރަށު ކައުންސިލްތަކާއި ސިޓީ ކައުންސިލްތަކުގެ އިތުރުން އަތޮޅު ކައުންސިލްތައް ވެސް ހިމެނޭނެ އެވެ.

ގާނޫނުއަސާސީގެ 261 ގައި ބަޔާންކޮށްފައިވާ ގޮތުން ގާނޫނުއަސާސީ އަށް އިސްލާހެއް ގެނެވޭނީ ރައްޔިތުންގެ މަޖިލީހުގެ ޖުމުލަ މެންބަރުންގެ ހަތަރުބައިކުޅަ ތިންބައިގެ އަގުލަބިއްޔަތުންނެވެ. އެހެންވެ، ޕާޓީ ބަދަލު ނުކުރެވޭ ގޮތަށް ގާނޫނު އަސާސީ ބަދަލުކުރެވޭނީ 70 މެންބަރުންގެ ވޯޓުންނެވެ.