ޓޫރިޒަަމްގެ ކަންބޮޑުވުން އިގުތިސާދީ ކޮމިޓީން އަޑުއަހަން ހުށަހަޅައިފި

އަހުމަދު ނިހާން

14 ނޮވެމްބަރ 2024 - 12:00

0 comments

ފަތުރުވެރިކަމުގެ ވިޔަފާރިތަކަށް ލިބޭ އާމްދަނީން މިންވަރެއް ބޭންކުތަކަށް މާރުކުރުން ލާޒިމުކުރުމަށް މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އެކުލަވައިލި ގަވާއިދާ ގުޅިގެން ސިނާއަތުގެ ވިޔަފާރިތަކުގެ ކަންބޮޑުވުންތައް އަޑުއެހުމަށް މަޖިލީހުގެ އިގުތިސާދީ ކޮމިޓީގެ ބައްދަލުވުމެއް ބޭއްވުމަށް ގަލޮޅު އުތުރު ދާއިރާގެ މަޖިލިސް މެންބަރު މުހައްމަދު އިބްރާހީމް (ކުޑޫ) ހުށަހަޅުއްވައިފި އެވެ.

އޭނަ މަޖިލީހުގެ ރައީސް އަބްދުﷲ އަބްދުއްރަހީމް އަށް އެޑްރެސް ކުރައްވައި އޭނަ ފޮނުއްވި ސިޓީއެއްގައި ވިދާޅުވީ ޓޫރިސްޓު ފެސިލިޓީތަކަށް ލިބޭ ޑޮލަރުން ވަކި މިންވަރެއް ރާއްޖޭގެ ބޭންކުތަކަށް މާރުކުރުން ލާޒިމުކުރުމުން ޓޫރިޒަމް ވިޔަފާރީގައި ހަރަކާތްތެރިވާ ވަރަށް ގިނަ ބައެއްގެ ކަންބޮޑުވުން ހުރި ކަމަށެވެ.

"ރާއްޖެއަށް ޒިޔާރަތްކުރާ ޓޫރިސްޓުންގެ ތެރެއިން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓު ހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރުކުރަން ލާޒިކޮށްފައިވާތީ ޓޫރިޒަމް ސިނާއަތުގައި އެކަމާ މެދު ނުހަނު ބޮޑަށް ކަންބޮޑަުވުން އޮތް ކަމަށް ދެކެމެވެ،" މެންބަރުގެ ސިޓީގައިވެ އެވެ.

އޭނަ ވިދާޅުވީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެ ގަވާއިދަކީ ޓޫރިޒަމް ސިނާއަތުގެ ވިޔަފާރީގެ ހަގީގަތްތަކާ ދުރު ރާއްޖޭގެ މި ވަގުތުގެ އިގުތިސާދީ ހާލަތާ ނުބައްދަލު ގަވާއިދެއް ކަމަށެވެ.

އިތުރަށް ސިޓީގައި ފާހަގަކުރެއްވީ އެ ގަވާއިދު އެކުލަވައިލުމުގެ ކުރިން ޓޫރިޒަމް ވިޔަފާރިތަކާއެކު ބޭއްވި ބައްދަލުވުމުގައި ސިނާއަތުގެ ކަންބޮޑުވުންތައް އެމްއެމްއޭއާ ހިއްސާކޮށް އެމްއެމްއޭއިން ހުށަހެޅި ފޯމިއުލާތަކާ ގުޅިގެން ކަންތައްތަކެއް އެ ބައްދަލުވުމުގައި ބައިވެރިވި ވިޔަފާރިތަކުން ހުށަހެޅި ނަމަވެސް އެއިން އެއްވެސް ހުށަހެޅުމެއް އެމްއެމްއޭއިން ބަލައިގަނެފައިނުވާކަމަށް ރިސޯޓު އޯނަރުންގެ ޖަމްއިއްޔާ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)އިން ބުނެފައިވާ ކަމެވެ.

އިތުރަށް ކުޑޫ ވިދާޅުވީ 30 އޮކްޓޯބަރުގެ ކުރިން އެމްއެމްއޭގައި ޓޫރިސްޓު ވިޔަފާރިތައް ރަޖިސްޓްރީވުމަށް ގަވާއިދުން ލާޒިމުކުރި ނަމަވެސް ގިނަ ވިޔަފާރިތައް ރަޖިސްޓްރީވެފައިނުވާ ކަމަށެވެ. އަދި އެކަމަށް ބާރުލިބެނީ 24 އޮކްޓޯބަރުގައި އަވަހަށް ވިޔަފާރިތަކުން ރަޖިސްޓްރީވާން އަންގައި އެމްއެމްއޭއިން ބަޔާނެއް ނެރުމުން ކަމަށްވެސް އޭނާ ވިދާޅުވި އެވެ.