ލަމްހާ ބަންދުން ދޫކޮށްލި މައްސަލަ ހައި ކޯޓުގައި އިސްތިއުނާފުކޮށްފި

އައިމިނަތު ޝިޔާޒާ

19 ނޮވެމްބަރ 2024 - 12:19

0 comments

ލަމްހާ

އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާ އަބްދުއްރަހްމާނު ބަންދުން ދޫކޮށްލަން ކްރިމިނަލް ކޯޓުން އަމުރުކުރި ކުރުން ދައުލަތުން ހައި ކޯޓުގައި އިސްތިއުނާފުކޮށްފި އެވެ.

ޕްރޮސެކިއުޓާ ޖެނެރަލްގެ އޮފީހުން ބުނީ ލަމްހާ ދޫކޮށްލި މައްސަލަ ހައި ކޯޓުގައި އިސްތިއުނާފްކުރަން ނިންމާފައިވާ ކަމަށެވެ. ހައި ކޯޓުގެ ރަޖިސްޓްރީން ދައްކާ ގޮތުގައި ކްރިމިނަލް ކޯޓުގެ އަމުރު އިސްތިއުނާފުކުރީ މިދިޔަ ބުރާސްފަތި ދުވަހުގަ އެވެ.

މީގެ ކުރިން މިދިޔަ އަހަރު ވެސް ކުއްލި ގޮތަކަށް ކްރިމިނަލް ކޯޓުން ލަމްހާ ދޫކޮށްލި އެވެ. އޭރު ހައި ކޯޓުން ނިންމީ ލަމްހާ ދޫކޮށްލީ ގާނޫނާ ހިލާފަށް ކަމަށާއި އެހެންވެ، އޭނާ އަލުން ޝަރީއަތް ނިމެންދެން ބަންދުކުރަން ހައި ކޯޓުން އެންގި އެވެ.

ލަމްހާ ދެ ފަހަރެއްގެ މަތިން ދޫކޮށްލިއިރު ވެސް، އެ މައްސަލާގައި ދައުވާލިބޭ މާވިން އަދިވެސް ހުރީ ބަންދުގަ އެވެ.

ލަމްހާ ބަންދުން ދޫކޮށްލީ ތިން މަސްދުވަހުގެ މުއްދަތަކަށް ޝަރުތުތަކާ އެކު އެވެ. ލަމްހާ ބަންދުން ދޫކޮށްލި ޝަރުތުތަކަކީ:

ރާއްޖެއިން ފުރައިގެން ނުދިއުމަށް
ގާނޫނާ ހިލާފު އަމަލެއް ނުވަތަ އިތުރު ކުށެއް ނުކުރަން
ކޯޓުން އަންގާ ކޮންމެ ވަގުތެއްގައި ކޯޓަށް ގަޑިއަށް ހާޒިރުވުމަށް
ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމަށާއި މާލެއިން ބޭރަށް ފުރައިގެން ނުދިއުމަށް؛ އެގޮތަށް ދާ ނަމަ ކޯޓުގެ ހުއްދަ ހޯދުމަށް
މި މައްސަލާގައި ހެކިބަސް ދީފައިވާ އެއްވެސް މީހަކާއި މޭރީގެ އާއިލާ މީހަކާ ވެސް ބައްދަލު ނުކުރުމަށް
ވަކި ގަޑިތަކެއްގައި ގޭގައި ހުރުމަށް