ކުންފުނީގެ ބިލު ފާސްކޮށްފި

މަރިޔަމް އަނާ

17 ސެޕްޓެމްބަރ 2024 - 11:26

0 comments

ރައްޔިތުންގެ މަޖިލީހުގެ ޖަލްސާއެއްގެ ތެރެއިން

ސަރުކާރުގެ ފަރާތުން ކުންފުނީގެ ޤާނޫނަށް ހުށަހަޅާފައިވާ އިސްލާހު ރައްޔިތުންގެ މަޖިލީހުން ފާސްކޮށްފިއެވެ.

ސަރުކާރުގެ ފަރާތުން ހުށަހެޅި ބިލަކީ މިހާރު އަމަލުކުރަމުންދާ ކުންފުނީގެ ގާނޫނުގައި ހުރި ބައެއް މާއްދާތައް އިސްލާހުކޮށް، އެ ގާނޫނުގެ ދަށުން ލާޒިމުކުރާ ބައެއް ކަންކަން ކުރުމަށް ކަނޑައަޅާފައިވާ މުއްދަތުތައް ކުރު ކުރުމަށް ސަރުކާރުގެ ފަރާތުން ހުށަހެޅި އިސްލާހެކެވެ.

އެގޮތުން ކުންފުނިތަކުގެ އާންމު ޖަލްސާ ބާއްވަންޖެހޭ މުއްދަތު ޖަލްސަ ބޭއްވުމަށް އެދޭތާ ތިން ދުވަހުގެ ތެރޭގައި ޖަލްސާއަށް ދައުވަތު ދީ 10 ދުވަހުގެ ތެރޭގައި ޖަލްސާަ ބާއްވަަން ވާނެ ކަމަށެވެ. އަދި ހާއްސަ އާންމު ޖަލްސާއެއް ބޭއްވުމަށް ހަމަޖެހިފައިވާ ދުވަހުގެ ހަތް ދުވަސްކުރިން ނޯޓިސް ފޮނުވާ ގޮތަށް ގާނޫނު އިސްލާހުކޮށްފައިވެ އެވެ.

އޭގެ އިތުރަށް ކުންފުނީގެ މެނޭޖިން ޑިރެކްޓަރެއް ނެތް ހާލަތުގައި ނުވަތަ ކުންފުނީގެ ޑިރެކްޓަރުންގެ ބޯޑުގެ މެންބަރުންގެ އަދަދު ކަނޑައެޅިފައިވާ އަދަދަށްވުރެ މަދުވެއްޖެނަމަ، ބޯޑަށް މެންބަރުން އަދި އެމްޑީ އައްޔަންކުރަން އަންގާތާ ދިހަ ދުވަހުގެ ތެރޭގައި އެމްޑީ އަދި ބޯޑުގެ މެންބަރުން އައްޔަންކުރަންޖެހޭނެ ކަމަށެވެ.

މަޖިލީހުން މި އިސްލާހުތައް ފާސްކޮށްފައިވަނީ މިއަދުގެ ޖަލްސާގައި، ވޯޓުގައި ބައިވެރިވި 85 މެންބަރުންގެ ވޯޓުންނެވެ. މި އިސްލާހު ފާސްކުރުމާ ދެކޮޅަށް އެއްވެސް މެންބަރަކު ވޯޓު ދެއްވާފައެއް ނުވެ އެވެ.

ސަރުކާރު މެންބަރުން ވަނީ އެ އިސްލާހުތައް ގެނައުމުން ރައްޔިތުންނަށް އެކަމުގެ ފައިދާތައް ވާނެ ކަމަށް ވިދާޅުވެފައެވެ.