އިންޑިއާ ދަތުރުން، އިގުތިސާދީގޮތުން ބޮޑު ފައިދާތަކެއް ލިބޭނެ: ފިނޭންސް މިނިސްޓަރު

އަލީ ރާޒީ

10 އޮކްޓޫބަރ 2024 - 14:41

0 comments

ރައީސް ޑރ. މުހައްމަދު މުޢިއްޒުގެ އިންޑިއާ ދަތުރުފުޅުގެ ސަބަބުން ރާއްޖޭގެ އިޤްތިސާދަށް ވަރަށް ބޮޑު ފައިދާތަކެއް ލިބިގެންދާނެކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.

އިންޑިއާ ދަތުރަށް ފަހު މީޑިއާތަކަށް ދެއްވި އިންޓަވިއެއްގައި މިނިސްޓަރު ވިދާޅުވީ އިންޑިއާއިއެކު ސޮއިކުރެވުނު ކަރަންސީ ސްވެޕް އެގްރީމެންޓްގެ ދަށުން ރާއްޖެއަށް ގާތްގަނޑަކަށް 700 މިލިއަން ޑޮލަރާއި ގާތުގެ ފައިސާ ލިބޭނެ ކަމަށެވެ. އޭގެ ސަބަބުން މިހާރު ހުރި ބައެއް ދަތިތައް ފިލައިގެން ދާނެ ކަމަށް ޒަމީރު ވިދާޅުވި އެވެ.

"ރާއްޖޭގެ ވަރަށް ގިނަ މީހުން މެޑިކަލް ބޭނުމަށް އަދި މަތީ ތައުލީމަށްވެސް އިންޑިއާއަށް އާދޭ، އެފަރާތްތަކަށް ޑޮލަރަށް ބަރޯސާ ނުވެ، ސީދާ ރުޕީސްއިން އެކަން ކުރެވޭނެ، މިއީ ބޮޑު ފަސޭހައަކަށް ވާނެ،" މިނިސްޓަރު ވިދާޅުވި އެވެ.

ވަޒީރު ޒަމީރު ވިދާޅުވީ ސަރުކާރުން މަސައްކަތްކުރަމުންދަނީ ދުނިޔޭގެ ހުރިހާ ގައުމުތަކާއެކުވެސް ގާތްގުޅުމެއް ބާއްވައިގެން މަސައްކަތްކުރުމަށްކަމަށެވެ. އަދި މިބާއްވާ ގުޅުންތަކުގައިވެސް ސަރުކާރުން އިސްކަންދެނީ ދިވެހި ރައްޔިތުންނަށް ފަހި ގޮތްތައް ހޯދާދިނުމަށް ކަމަށް މާލީ މިނިސްޓަރު މޫސާ ޒަމީރު ވިދާޅުވި އެވެ.

އޭގެ އިތުރުން ޒަމީރު ވިދާޅުވީ އެ ދަތުރުގައި އިންޑިއާއާއި ރާއްޖެއާ ދެމެދު އޮތް ގުޅުން ވަނީ ހަރުދަނާވެފައި ކަމަށެވެ. އަދި އެ ދަތުރުގައި މައިގަނޑު ގޮތެއްގައި ކުރި މަސައްކަތަކީ އިންޑިއާގެ ވިޔަފާރިތައް ރާއްޖޭގައި އިންވެސްޓްކުރުމަށް މަގިފަހި ކުރުން ކަމަށްވެސް ވިދާޅުވި އެވެ. ތިން ފޯރަމްގައި އެ މަސައްކަތް ކޮށްފައިވާނެ ކަމަށް ވިދާޅުވި އެވެ.

އާދިއްތަ ދުވަހުން މިއަދުގެ ނިޔަލަށް ރައީސް އިންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިން އެ ގައުމުގެ ރައީސް ދްރޫޕަތީ މުރްމޫއާއި އެ ގައުމުގެ ބޮޑުވަޒީރު ނަރެންދްރާ މޯދީއާ ވެސް ވަނީ ބައްދަލުކުރައްވައިފަ އެވެ.

ފާހަގަކޮށްލެވޭ ގޮތުގައި ރައީސްގެ އިންޑިއާ ދަތުރުފުޅާ ގުޅިގެން އިދިކޮޅު ފަރާތްތަކުން އަންނަނީ ވަރަށް ބޮޑަށް ފާޑުކިޔަމުންނެވެ. ޚާއްސަކޮށް، އެ މަނިކުފާނު ނިސްބަތްވާ ޕީއެންސީގެ ބޭބޭފުޅުން ކުރިން ކުރައްވާފައިވާ ތުހުމަތުތައް އަންނަނީ މީސްމީޑިއާގައި ދައުރުކުރަމުންނެވެ.

އެކަމަކު، ރައީސް މުއިއްޒު ވަނީ އިންޑިއާ ދަތުރުފުޅުގައި މިނިވަންކަން ގެއްލުންވާނެ އެއްވެސް ކަމެއް ނުކުރައްވާ ކަމަށް ވިދާޅުވެފަ އެވެ.