ވެލާނާ އެއާޕޯޓް މޮނަރޭލުން ގުޅާލާ މަޝްރޫއު ހިންގަން ބީޔޫސީޖީއާ އެކު ސޮއިކޮށްފި

ހަސަން ހަލީމް

15 އޮކްޓޫބަރ 2024 - 12:24

0 comments

ކ. ފުނަދޫގައި ގާއިމް ކުރަން ނިންމާފައިވާ ސްޕެޝަލް އިކޮނޮމިކް އެންޑް ފައިނޭންޝަލް ސާވިސް ޒޯނުގެ ތެރެއިން މާލެ-ފުނަދޫ ގުޅާލާ މޮނަރޭލް އަޅަން ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ)އާއެކު އެމްއޭސީއެލް އިން މިއަދު އެއްބަސްވުމުގައި ސޮއިކޮށްފި އެވެ.

އެމްއޭސީއެލްގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަދި ސީއީއޯ އިބްރާހީމް ޝަރީފް މުހައްމަދު އެވެ. ބީޔޫސީޖީގެ ފަރާތުން އެއްބަސްވުމުގައި ސޮއި ކުރެއްވީ އެކުންފުނީގެ ޖެނެރަލް މެނޭޖަރު ލޫ ވެއި އެވެ.

މި ޕްރޮޖެކްޓަށް ފަންޑު ކުރާނީ ޔޫއޭއީގެ އިންޓަނޭޝަނަލް ފްރީޒޯން އޮތޯރެޓީ (އިފްޒާ)އިން ކަމަށް މީގެ ކުރިން އިކޮނޮމިކް މިނިސްޓަރު ވަނީ ވިދާޅުވެފައެވެ.

ސަރުކާރުން ކުރިން އާންމުކުރި ޕްލޭންގައިވަ ގޮތުން މާލެ ކައިރި އޮތް ތެޔޮފުނަދޫގައި ތަރައްގީކުރަނީ ފައިނޭންޝަލް ސެންޓަރެވެ. ސީޕްލޭން ޓާމިނަލްގެ އޮޕަރޭޝަންތައް ބަދަލުކުރަނީ ޝެރަޓަން ރިޒޯޓު ހިންގާ ރަށަށެވެ. އަދި އަދި ހުޅުލޭން ސީޕްލޭން ޓާމިނަލަށް ބްރިޖު އަޅައި ދަތުރުފަތުރުގެ ނިޒާމުން ގުޅައިލުމަކީ ސަރުކާރުގެ ޕްލޭނެވެ.

އެ ޕްރޮޖެކްޓާ ގުޅޭގޮތުން ރައީސް މުހައްމަދު މުއިއްޒު ކުރިން ވިދާޅުވެފައިވަނީ ފުނަދޫ އާއި މާލެ އަދި ފުނަދޫ އާއި ހުޅުލެ ބުރިޖުން ގުޅާލާނެ ކަމަށެވެ.

ފުނަދޫގައި ކުރިއަށް ގެންދަން ނިންމާފައިވާ މަޝްރޫއުގެ ދަށުން އެރަށް އެއާޕޯޓް އިކޮނޮމިކް ޒޯނަކަށް ބަދަލުކުރާނެ އެވެ.

ވީއައިއޭގެ ތިންވަނަ ފިޔަވަހީގެ މަޝްރޫއު ނިމުމުން އަހަރަކު 25 މިލިއަން މީހުންނަށް ހިދުމަތްދެވޭއިރު ގަޑިއަކު 4،000 މީހުންނަށް ހިދުމަތް ދެވޭނެ އެވެ. މި މަޝްރޫއުގެ ތެރެއިން ޑޮމެސްޓިކް ޓާމިނަލް 35،000 35000 އަކަމީޓަރުގެ ސަރަޙައްދަކަށް ބޮޑުކޮށް ޑޮމެސްޓިކް ޓާމިނަލްގައި މިހާރު ގަޑިއަކު ހިދުމަތް ދެވޭ 300 މީހުންގެ އަދަދު 2،000 މީހުންނަށް އިތުރުކުރެވިގެންދާނެ އެވެ. ޕަސެންޖަރުންނަށް ހިދުމަތް ދިނުމަށް އަށް ގޭޓް ޑޮމެސްޓިކް އެއާޕޯޓުގައި ގާއިމުކުރުމަށްވެސް ހަމަޖެހިފައިވެ އެވެ.