އެމްއޭސީއެލްއިން މި ފަހަރުވެސް މުސާރަ ދިނީ ޑޮލަރުން

ހަސަން ހަލީމް

30 ސެޕްޓެމްބަރ 2024 - 12:23

0 comments

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން މި މަހު ވެސް މުވައްޒަފުންނަށް މުސާރައިގެ އެއްބައި ޑޮލަރުން ޖަމާކޮށްދީފި އެވެ.

ސަރުކާރުގެ ކުންފުނިތަކާއި އެ ކުންފުނިތަކުގެ ސަބްސިޑަރީ ކުންފުނިތަކުގެ ހަރަދު ކުޑަކުރުމަށް އަންގާ ޕީސީބީން ސާކިއުލާއެއް ނެރުނީ މި މަހު ތިނެއްގަ އެވެ.

އެގޮތުން ސަރުކާރު ކުންފުނިތަކުގެ މުވައްޒަފުންގެ ހަރަދު ކުޑަކުރުމަށް އަޅަން އެންގި ފިޔަވަޅުތަކުގެ ތެރެއިން ހަތަރުވަނައަށް ޕީސީބީން އަންގާފައިވަނީ ޑޮލަރުން ޑޮލަރުން އާމްދަނީ ލިބޭ ސަރުކާރުގެ ކުންފުނިތަކުން މުވައްޒަފުންނަށް ޑޮލަރުން މުސާރަ ދިނުން ހުއްޓާލުމަށެވެ. ސަރުކާރު ކުންފުނިތަކުގެ ތެރެއިން ޑޮލަރުން މުސާރަ ދެނީ އެމްއޭސީއެލް އިން އެކަންޏެވެ.

އެކަމަކު، އިތުބާރު ހުރި އެކި މަސްދަރުތަކުން އެނގިފައިވާ ގޮތުގައި މި މަހު ވެސް އެމްއޭސީއެލްގެ މުވައްޒަފުންނަށް މުސާރައިގެ އެއްބައި ޖަމާކޮށްފައިވަނީ ޑޮލަރުންނެވެ.

މި ނިންމުމާ ގުޅޭގޮތުން އެ ކުންފުނީގެ ރަސްމީ ބަހެއް ހޯދުމަށް ކުރި މަސައްކަތް އަދި ވަނީ ކާމިޔާބު ވާގޮތް ނުވެފަ އެވެ.

އެ ކުންފުނީގެ މުވައްޒަފުންގެ މުސާރައިގެ ދެބައިކުޅަ އެއްބައި ޑޮލަރުން ދޭން ފެށީ އިންޑިއާގެ ޖީއެމްއާރުއިން އެއާޕޯޓް ހިންގިއިރުއެވެ. ނަމަވެސް ފަހުން ކޮވިޑާ ގުޅިގެން 2020 ވަނަ އަހަރު ވަނީ ހަމައެކަނި ރުފިޔާއިން މުސާރަ ދޭން ފަށައިފަ އެވެ.