ޑޮލަރު މާރުކުރަން 173 ރިސޯޓް ރަޖިސްޓާކޮށްފި

އަލީ ރާޒީ

14 ނޮވެމްބަރ 2024 - 09:23

0 comments

ބޭރުފައިސާއާ ބެހޭ ގަވާއިދުގެ ދަށުން މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގައި ރާއްޖޭގައި އޮޕަރޭޓްކުރާ ގިނަ އަދަދެއްގެ ރިސޯޓުތަކުން ރަޖިސްޓަރީ ވެއްޖެ އެވެ.

އެމްއެމްއޭ އިން މިމައުލޫމާތު ހާމަކޮށްފައި މިވަނީ ރިސޯޓްތަކަށް ލިބޭ ޑޮލަރު މާރުކުރަންޖެހޭ ގޮތަށް ހަދާފައިވާ ގަވައިދު ސަސްޕެންޑް ކުރުމަށް ޓޫރިޒަމް ދާއިރާގައި ހަރަކާތްތެރިވާ ރާއްޖޭގެ އެންމެ ބޮޑު އެއް ކުންފުނި ޗަމްޕާ ބްރަދާސްގެ ވެރިޔާ މުހައްމަދު މޫސާ (އުއްޗު) ސަރުކާރާއި އެމްއެމްއޭގައި އެދިވަޑައިގެންފައި ވަނިކޮށެވެ.

އެމްއެމްއޭ އިން އެކުލަވާލި މި ގަވައިދަށް އަމަލުކުރަން ފެށި މިދިޔަ އޮކްޓޫބަރު އެއްވަނަ ދުވަހު އެވެ.

ފޮރިން އެކްސްޗޭންޖް ރޭޓްގެ ނިޒާމު ތަންފީޒު ކުރުމަށް ބޭރު ފައިސާ އިން ކުރާ މުއާމަލާތްތައް ކަނޑައެޅުމާއި ފޮރިން އެކްސްޗޭންޖް ރޭޓާބެހޭ އެހެނިހެން ސިޔާސަތުތައް ކަނޑައެޅުމެގެ ގަވާއިދަށް މިހާރު ވަނީ އަމަލުކުރަން ފަށާފަ އެވެ.

އެމްއެމްއޭ އިން ބުނީ، މި ގަވާއިދުގެ 5 ވަނަ މާއްދާގެ ދަށުން، ޓޫރިޒަމް ދާއިރާގެ މުދާ ވިއްކާ ފަރާތްތަކާއި ހިދުމަތް ފޯރުކޮށްދޭ ފަރާތްތަކުގެ ގޮތުގައި މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގައި ރަޖިސްޓްރީކޮށްފައިވާ ހުރިހާ ފަރާތްތަކުން އެމްއެމްއޭގައި ރަޖިސްޓްރީން ވާން ޖެހޭ ކަމަށެވެ.

މިފަދަ ކަންކަމަކީ ރާއްޖޭގެ ފޮރިން އެކްސްޗޭންޖް މާކެޓް އިތުރަށް ފުޅާ ކުރުމަށާއި ފޮރިން އެކްސްޗޭންޖް ސިޔާސަތުތައް ފުރިހަމައަށް ތަންފީޒު ކުރުމަށް މުހިންމު ކަމެއް ކަމަށް އެމްއެމްއޭ އިން ބުނެ އެވެ. އަދި ހުރިހާ ފަރާތްތަކުން ވެސް މިކަމަށް އެއްބާރުލުން ދިނުމަށް އެމްއެމްއޭ އިން ވަނީ އެދިފަ އެވެ.

ރާއްޖެއަށް ވަންނަ ބޭރު ފައިސާއާ ބެހޭ ގަވާއިދުގެ ދަށުން ޓޫރިޒަމް ދާއިރާ އަށް ބޭރު ފައިސާ އިން ލިބޭ އާމްދަނީގެ ތެރެއިން ބައެއް ބޭންކުތަކަށް މާރުކުރުން އެމްއެމްއޭ އިން ވަނީ ލާޒިމުކޮށްފަ އެވެ.

ޓީޖީއެސްޓީ ދައްކާ ފަރާތްތަކުން މިގަވައިދުގެ ދަށުން ޕޯޓަލެއް މެދުވެރިކޮށް ރަޖިސްޓަރީ ކުރުމަށް ހުޅުވާލުމުން މިވަގުތު ރާއްޖޭގައި ރިސޯޓުގެ ގޮތުގައި ހިންގާ 174 ރިސޯޓުގެ ތެރެއިން 173 ރިސޯޓް ރަޖިސްޓަރީ ކޮށްފައިވާ ކަމަށް އެމްއެމްއޭ އިން ބުނެ އެވެ.