ޕާޓީތައް އެއްލައްކަ ރުފިޔާއިން ޖޫރިމަނާ ކުރެވޭ އިސްލާހެއް

އަހުމަދު ނިހާން

30 އޮކްޓޫބަރ 2024 - 12:24

0 comments

ސިޔާސީ ޕާޓީއެއްގެ މެމްބަރަކު ގާނޫނާއި ހިލާފު ކަމެއް ކޮށްފިނަމަ އެމީހަކު ޖޫރިމަނާ ކުރުމުގެ އިތުރުން އެ މީހަކު ނިސްބަތްވާ ޕާޓިއެއް އެއްލައްކަ ރުފިޔާއިން ޖޫރިމަނާ ކުރެވޭ ގޮތަށް ސިޔާސީ ޕާޓީތަކުގެ ގާނޫނު އިސްލާހު ކުރުމަށް ސަރުކާރުގެ ފަރާތުން މަޖިލީހަށް ހުށައަޅައިފި އެވެ.

މި އިސްލާހު ހުށަހެޅުއްވީ ދިއްދޫ ދާއިރާގެ ޕީއެންސީ މެންބަރު އަބްދުއްލަތީފް މުހައްމަދެވެ. އިސްލާހު ހުށަހަޅާފައި ވަނީ ސިޔާސީ ޕާޓީގެ ގާނޫނުގެ 49 ވަނަ މާއްދާއަށެވެ.

ސަރުކާރުން މި ބިލު ހުށަހެޅުމުގެ ބޭނުމެއްގެ ގޮތުގައި އިސްލާހުގައި ބުނެފައިވަނީ، ސިޔާސީ ޕާޓީތައް ހިންގުމަށް ދައުލަތުގެ ބަޖެޓުން ފައިސާ ދިނުމަށް ސިޔާސީ ޕާޓީގެ ގާނޫނުގައި ކަނޑައަޅާފައިވާ އުސޫލު އިސްލާހުކުރުމަށާއި، ގާނޫނާ ޚިލާފުވާ ހާލަތްތައް މަދުކުރުމުގައި ސިޔާސީ ޕާޓީތަކުން ޒިންމާ އުފުލުމަށް ބާރުއެޅުމުގެ ގޮތުން ގާނޫނާ ޚިލާފުވާ ވަކިވަކި ފަރާތް ޖޫރިމަނާކުރުމެވެ.

އިސްލާހުގައި ވާގޮތުގައި ސިޔާސީ ޕާޓީތަކުގެ ގާނޫނާ ޚިލާފުވާ މީހަކު 30،000 ރުފިޔާއާއި 75،000 ރުފިޔާއާ ދެމެދުގެ އަދަދަކަށް ޖޫރިމަނާ ކުރެވޭނެއެވެ. އެ އަމަލެއް ހިންގި ފަރާތް ނިސްބަތްވާ ޕާޓީއެއް 100،000 ރުފިޔާއިން ޖޫރިމަނާ ކުރެވޭނެ ކަމަށް އިސްލާހުގައި ބަޔާންކޮށްފައިވެއެވެ.

ސިޔާސީ ޕާޓީތަކުގެ ގާނޫނުގެ 49 މާއްދާ މިހާރު އޮތް ގޮތުން ގާނޫނާ ހިލާފަށް ޕާޓީއެއްގެ މެމްބަރެއްގެ ގޮތުގައި ހެދުމަށް ނަން ހުށަހަޅައިފިނަމަ އެ އަމަލު ހިންގި ފަރާތެއް 5,000 ރުފިޔާ އާއި 10,000 ރުފިޔާގެ އަދަދަކުން ޖޫރިމަނާ ކުރެވެ އެވެ.

ލަތީފް ވަނީ ދައުލަތުގެ ބަޖެޓުން ސިޔާސީ ޕާޓީތަކަށް ފައިސާ ދޫކުރާ އުސޫލު ވެސް ބަދަލުކުރަން ހުށަހަޅާފަ އެވެ. ގާނޫނުގައި މިހާރު އޮންނަ ގޮތުން ޕާޓީ ތަކަށް ފައިސާ ދޫކުރަނީ ދައުލަތުގެ އަހަރީ ބަޖެޓުގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދަކުންނެވެ. ލަތީފް އިސްލާހު ހުށަހަޅުއްވާފައިވަނީ ދައުލަތުގެ އަހަރީ ބަޖެޓްގެ ޕަސެންޓް ދައުލަތުގެ އަހަރީ ބަޖެޓްގައި އެ އަހަރަކަށް ލަފާ ކުރާ އާމްދަނީގެ 0.1 ޕަސެންޓާއި 0.2 ޕަސެންޓާ ދެމެދުގެ އަދަދަކަށް ބަދަލު ކުރާށެވެ.

މީގެއިތުރުން ސިޔާސީ ޕާޓީއެއްގެ ޕްރައިމަރީއެއްގައި ވާދަކުރުމަށްފަހު ނާކާމިޔާބުވުމުން އިންތިހާބުގައި ވާދަނުކުރެވޭ ގޮތަށް އޮތް އޮތުން އުވާލުމަށްވެސް ލަތީފް ވަނީ ހުށަަހަޅުއްވާފަ އެވެ.