އީސީގެ ރައީސަކަށް ޒާހިދު، ނައިބަކަށް ސޮލާހު އައްޔަންކުރަން ރުހުން ދީފި

މަރިޔަމް އަނާ

17 ފެބުރުއަރީ 2025 - 11:56

0 comments

އިލެކްޝަންސް ކޮމިޝަން (އީސީ) ގެ ރައީސް އާއި ނައިބުރައީސްގެ މަގާމަށް އައްޔަނުކުރަން ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވި ދެ ބޭފުޅުންނަށް މިއަދު ރުހުންދީފި އެވެ.

އިލެކްޝަންސް ކޮމިޝަންގެ ގާނޫނަށް އެންމެ ފަހުން ގެނައި އިސްލާހުގެ ދަށުން އެ ކޮމިޝަންގެ ރައީސާއި ނައިބު ރައީސް ކަނޑައެޅުމުގެ ބާރު ދީފައި އޮންނަނީ މަޖިލީހުގެ ރުހުމާއެކު ރައީސަށެވެ. މި ދެ ބޭފުޅުންގެ ނަމަށް ރުހުން ހޯދަން ރައީސް ޑރ. މުހައްމަދު މުއިއްޒު މަޖިލީހަށް ފޮނުއްވީ މިދިޔަ ހަފްތާގަ އެވެ.

މި ދެ ބޭފުޅުން އެ މަގާމުތަކަށް އައްޔަން ކުރަން މަޖިލީހުގައި މިއަދު ނެގި ވޯޓުގައި ދެ ބޭފުޅުންނަށް ރުހުން އޮތް ކަމަށް ފާސްވީ ވޯޓުގައި ބައިވެރިވި ހުރިހާ މެންބަރުންގެ އިއްތިފާގުންނެވެ.

އީސީގެ މެމްބަރަކަށް ޒާހިދާއި ސޮލާހު އައްޔަން ކުރެއްވީ މިދިޔަ މަހު އެވެ.

މުހައްމަދު ޒާހިދު އާއި އަބްދުއްރަހްމާން ސަލާހް އީސީގެ މެންބަރު ކަމަށް އައްޔަންކުރަން ރައްޔިތުންގެ މަޖިލީހުން ފާސްކުރީ މިދިޔަ މަހުގެ 16 ވަނަ ދުވަހު ދައުރުން ބޭރުގައި ބޭއްވި ޖަލްސާގަ އެވެ.