އީސީގެ ރައީސަކަށް ޒާހިދު، ނާއިބަކަށް ސޮލާހު އައްޔަންކުރަން ފޮނުވައިފި

މަރިޔަމް އަނާ

10 ފެބުރުއަރީ 2025 - 11:19

0 comments

ޒާހިދާއި ޞަލާޙު ހުވައިކުރެއްވުން: އެ ދެބޭފުޅުން ވަނީ އިސީގެ މެންބަރު ކަމަށް އައްޔަނުކުރައްވާފައި ---

އިލެކްޝަންސް ކޮމިޝަން (އީސީ)ގެ ރައީސްކަމަށް މިހާރު އެ ކޮމިޝަންގެ މެންބަރުކަން ކުރައްވަމުން ގެންދަވާ މުޙައްމަދު ޒާހިދު އައްޔަންކުރެއްވުމަށް ރައީސް ޑރ. މުޙައްމަދު މުއިއްޒު މަޖިލީހަށް ނަން ހުށަހަޅުއްވައިފިއެވެ.

އީސީގެ ރައީސް ކަމަށް އައްޔަންކުރަން ރައީސް މުއިއްޒު ހުށަހަޅުއްވާފައިވަނީ އެ ކޮމިޝަންގެ މެންބަރު މުހައްމަދު ޒާހިދު، ދަފުތަރު ނަންބަރު ރސ 1548 ގެ ނަމެވެ. އަދި އީސީގެ ނައިބުރައީސްކަމަށް އައްޔަންކުރަން ހުށަހެޅުއްވީ އީސީގެ މެންބަރު އަބްދުއްރަޙްމާން ސަލާހް ރަޝީދު، ކ.ހުރާ، ރޯޒް ގެ ނަމެވެ.

އީސީގެ މެންބަރު ކަމަށް މުހައްމަދު ޒާހިދު އާއި އަބްދުއްރަޙްމާން ސަލާހް ރަޝީދު އައްޔަންކުރީ މިދިޔަ ޖެނުއަރީ މަހުގެ 26 ވަނަ ދުވަހު އެވެ.

އިލެކްޝަންސް ކޮމިޝަންގެ ގާނޫނަށް އެންމެ ފަހުން ގެނައި އިސްލާހުގެ ދަށުން އެ ކޮމިޝަންގެ ރައީސާއި ނައިބު ރައީސް ކަނޑައެޅުމުގެ ބާރު ދީފައި އޮންނަނީ ރައީސުލްޖުމްހޫރިއްޔާއަށެވެ.

ޒާހިދު ވަނީ މީގެ ކުރިން ހިއުމަން ރައިޓްސް ކޮމިޝަން (އެޗްއާރްސީއެމް)ގެ ނައިބު ރައީސްކަން ކުރައްވައިފައެވެ. އޭނާ އެ މަގާމުން ވަކިކުރީ 2020ވަނަ އަހަރެވެ. އޭގެ ކުރިން އޭނާ ވަނީ އެޗްއާރްސީއެމްގެ މެންބަރުކަން ވެސް ކުރައްވާފައެވެ. އަދި، ޖެންޑާ މިނިސްޓްރީގެ ޑެޕިއުޓީ މިނިސްޓަރުކަން ވެސް ކުރައްވައިފައެވެ.

ސޮލާހަކީ މީގެ ކުރިން އީސީގެ ސެކެރެޓްރީ ޖެނެރަލްގެ މަގާމު ފުރުއްވާފައިވާ ބޭފުޅެކެވެ. އަދި، ހޯމް މިނިސްޓްރީގެ ޕާމަނަންޓް ސެކެރެޓްރީގެ މަގާމު ވެސް އޭނާ ވަނީ މީގެ ކުރިން އަދާކުރައްވާފައެވެ.