ބީއެމްއެލްގެ ބޯޑުގައި ޝަރީފް ހިމަނައި އެމްޑީގެ މަގާމަށް ރަސްމީކޮށް ހަމަޖައްސައިފި

މަރިޔަމް އަނާ

30 އޮކްޓޫބަރ 2024 - 18:55

0 comments

މުޙައްމަދު ޝަރީފް

ބޭންކް އޮފް މޯލްޑިވްސްގެ މެނޭޖިން ޑިރެކްޓަރުގެ މަގާމަށް، ބޭންކުގެ ސީއީއޯ މުޙައްމަދު ޝަރީފް އައްޔަންކޮށްފި އެވެ.

ބީއެމްއެލްގެ އެމްޑީގެ މަގާމު ހުސްވީ، ކުރިން ބީއެމްއެލްގެ ސީއީއޯ އަދި އެމްޑީކަން ކުރެއްވި ކާލް ސްޓުމްކަ މިދިޔަ މަހުގެ 9 ވަނަ ދުވަހު މަގާމުން އިސްތިއުފާ ދެއްވުމުންނެވެ.

ބީއެމްއެލް އިން މިއަދު ބުނީ އެމްޑީގެ މަގާމަށް މުހައްމަދު ޝަރީފް އައްޔަނުކުރީ މިއަދު ބޭއްވި ހާއްސަ އާންމު ޖަލްސާއަށް ފަހު އޮތް ޑިރެކްޓަރުންގެ ބޯޑު ބައްދަލުވުމުގައި ކަމަށެވެ. ހާއްސަގޮތުން ކުރި ހިއްސާދާރުންގެ އާންމު ޖަލްސާގައި ޝަރީފް ވަނީ ބެންކުގެ ބޯޑަށް އައްޔަންކޮށްފަ އެެވެ.

ބެންކުގެ ސީއީއޯގެ މަގާމާ ޝަރީފް ހަވާލުވެވަޑައގެންފައި ވަނީ މިމަހުގެ 17ގަ އެވެ. އޭނާ އަކީ ބީއެމްއެލްގެ ފުރަތަމަ ދިވެހި ސީއީއޯ އެވެ.

ޝަރީފަކީ މާލީ ދާއިރާގައި 25 އަހަރަށްވުރެ ދިގު މުއްދަތެއްގެ ތަޖުރިބާ ހޯއްދަވާފައިވާ ބޭފުޅެކެވެ. މީގެ ތެރޭގައި އެގްޒެކްޓިވް އަދި ބޯޑު ލެވަލްގައި ހަތް އަހަރަށްވުރެ ދިގު މުއްދަތެއްގެ ތަޖުރިބާ ވެސް ހޯއްދަވައިފައިވެ އެވެ.

ބީއެމްއެލްގައި މަސައްކަތްކުރެއްވި މުއްދަތުގައި ޝަރީފް ވަނީ ބޭންކުގެ ހިންގުން ޒަމާނީ ކުރުމަށާއި ބޭންކުން ހޯދާފައިވާ ކާމިޔާބީގައި ވަރަށް މުހިއްމު ދައުރެއް އަދާކުރައްވައިފަ އެވެ. އެގޮތުން ޝަރީފް ވަނީ ކޯ-ބޭންކިން ސިސްޓަމްތައް ގާއިމުކުރުމާއި، ޑެބިޓް އަދި ކްރެޑިޓް ކާޑު ތައާރަފުކުރުމާއި، ބޭންކުގެ ޚިދުމަތްތައް ޑިޖިޓަލް ކުރުމަށް ކުރި މަސައްކަތުގެ ދަށުން އިންޓަނެޓް އަދި މޮބައިލް ބޭންކިން، ސެލްފް ސާވިސް ބޭންކިންގެ އިތުރުން އީކޮމާސް ޕޭމަންޓް ގޭޓްވޭ ތައާރަފުކުރުމުގައި އިސް ދައުރެއް އަދާކުރައްވާފައި ކަމަށް ބީއެމްއެލްއިން ބުންޏެވެ.

ޝަރީފް ވަނީ އިނގިރޭސިވިލާތުގެ ޔުނިވާސިޓީ އޮފް މެންޗެސްޓާއިން އެމްބީއޭ ހާސިލްކުރައްވާފައެވެ. މީގެ އިތުރުން ލަންޑަން ބިޒްނަސް ސްކޫލްއިން ސީއީއޯއިންނާއި ސީނިއާ އެގްޒެކްޓިވުންނަށް ފަރުމާކޮށްފައިވާ 'ސީނިއާ އެގްޒެކްޓިވް ޕްރޮގްރާމް' ފުރިހަމަ ކުރައްވާފަ އެވެ.

މީގެއިތުރުން 2018އިން 2020އަށް އޭޝިއަން ބޭންކާސް އެސޯސިއޭޝަންގެ ވައިސް ޗެއާމަންގެ މަގާމު ވެސް ޝަރީފް ވަނީ އަދާކުރައްވާފަ އެވެ.