އުމްރާއަށް އަގު ހެޔޮ ޕެކޭޖްތައް ތައާރަފްކުރަން މިނިސްޓަރު އެދިވަޑައިގެންފި

ހުމާ ނަސީމް

31 އޮކްޓޫބަރ 2024 - 11:57

0 comments

އަގުހެޔޮކޮށް އުމްރާއަށް ދެވޭނެ ޕެކޭޖުތަކެއް ތައާރަފްކޮށްދިނުމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެދިވަޑައިގެންފި އެވެ.

"ހައްޖު އުމްރާ ކޮންފަރަންސް" ފެށުމަށް އިސްލާމިކް މިނިސްޓްރީގައި މިއަދު ބޭއްވި ޖަލްސާގައި ވާހަކަ ދައްކަވަމުން މިނިސްޓަރު ވަނީ އާންމުކޮށް އުމްރާއަށް ގެންދާ ގްރޫޕްތަކަށް ހުށަހެޅުމެއް ހުށަހަޅުއްވައިފަ އެވެ.

އުމްރާއަށް ގެންދިއުމުގައި ނިޒާމީ ބަދަލެއް ގެންނަން ޖެހޭކަން ފާހަގަ ކުރައްވައި މިނިސްޓަރު ވިދާޅުވީ އެއީ މިނިސްޓްރީން ކުރަން ޖެހޭ މަސައްކަތެއް ނޫން ކަމަށެވެ.

ޝަހީމް ވިދާޅުވީ އުމްރާއަށް މީހުން ގެންދާ ގުރޫޕްތަކުން މިހާރު އެކަން ކުރަނީ ވަކި ދުވަސްވަރަކު ވަކި މުނާސަބަތަކާ ގުޅުވައިގެން ކަހަލަ ގޮތަކަށް ކަމަށެވެ. ނަމަވެސް އަހަރުގެ ކޮންމެ ދުވަހަކުވެސް އުމްރާއަށް ދެވޭނެ އަގުހެޔޮ ފަސޭހަ ގޮތަކަށް ނިޒާމު ބަދަލުކުރަންޖެހޭ ކަމަށްވެސް ވިދާޅުވި އެވެ.

"އެކަމަކު އެއީ މިނިސްޓްރީން ކުރަންޖެހޭ މަސައްކަތެއް ކަމަކަށް ނުދެކެން،" ޝަހީމް ވިދާޅުވި އެވެ.

މިނިސްޓަރު ވިދާޅުވީ އުމްރާ ދަތުރުތައް އަގު ހެޔޮ ކުރެވޭނެ އެއް ގޮތަކީ މައްކާގެ ހަރަމްފުޅާ ދުރުން ހޮޓާތައް ނެގުން ކަމަށެވެ. އެހެންކަމުން އަގުހެޔޮ ޕެކޭޖުތަކެއް ތައާރަފް ކުރެވޭނެ ގޮތްތަކެއް ހޯދައިދިނުމަށް އެދިވަޑައިގެންނެވި އެވެ.

އުމްރާ ޕެކޭޖްތަކުގެ އަގުތައް ހުރި ގޮތުން އެ އަގުތަކުގައި ކޮންމެ މީހަކަށް އުމްރާއަށް ނުދެވޭނެކަން ފާހަގަކުރައްވައި ޝަހީމް ވިދާޅުވީ 20،000 ރުފިޔާއާއި 15،000 ރުފިޔާގެ ޕެކޭޖުތަކެއް ހެދިއްޖެނަމަ ވަރަށް ގިނަ ބަޔަކަށް އުމްރާއަށް ދެވޭނެ ކަމަށް ބެލެވޭ ކަމަށެވެ.

ހާއްޖާއި އުމްރާ ޕެކޭޖުތައް އަގުބޮޑު ކަމުގެ ޝަކުވާ އަބަދު ވެސް ކުރެ އެވެ. އުމްރާ ޕްކޭޖެއް މިހާރު އުޅެނީ 28،000ރ. އާއި 37،000ރ. ދެމެދު އެވެ.