ނިޝާން އިއްޒުއްދީނުގެ އިއްޒަތުގެ ވެރިޔާގެ ޝަރަފު ޒާހިރު ހުސެއިންއަށް އަރުވަނީ

މަރިޔަމް އަނާ

09 ނޮވެމްބަރ 2024 - 13:19

0 comments

މުޙައްމަދު ޒާހިރު ހުސައިން - ފޮޓޯ/ ސީއޭ މޯލްޑިވްސް

ރާއްޖޭގެ ތައުލީމަށް ހިދުމަތް ކުރުމުގެ އެންމެ މަތިވެރި ޝަރަފު، ނިޝާން އިއްޒުއްދީނުގެ އިއްޒަތުގެ ވެރިޔާ އަދި ރާއްޖޭގެ އިސްލާމީ ޔުނިވާސިޓީގެ ޗާންސެލަރު ޑރ. މުހައްމަދު ޒާހިރު ހުސައިނަށް އަރުވަން ރައީސް ޑރ. މުހައްމަދު މުއިއްޒު ނިންމަވައިފި އެވެ.

ރައީސް އޮފީހުން ބުނީ ޒާހިރަށް އެ ޝަރަފު އެރުވުމަށް ނިންމީ، ރާއްޖޭގެ ތައުލީމީ ދާއިރާގެ ތަރައްގީ އާއި ރާއްޖޭގައި ތައުލީމު ފުޅާކުރުމަށާއި، ތައުލީމީ ރޮނގުން ރާއްޖޭގެ ރައްޔިތުން ހޭލުންތެރި ކުރުމަށް އިހްލާސްތެރި ކަމާއެކު ގިނަގުނަ ހިދުމަތްތަކެއް ކޮށްދެއްވާފައިވާތީ އެކަމުގެ އަގު ވަޒަންކުރުމުގެ ގޮތުން ކަމަށެވެ.

ޒާހިރަށް އެ ޝަރަފު އެރުވުން އޮންނާނީ، ޖުމްހޫރީ ދުވަހުގެ މުނާސަބަތުގައި މާދަމާ ރޭ 8:15 ގައި ދަރުބާރުގޭގައި ބާއްވަވާ ރަސްމީ ޖަލްސާގައި ކަމަށް ރައީސް އޮފީހުން ބުންޏެވެ.

މަތީ ދަރަޖަ ހޯދާ މީހުންނަށް ރައީސް ދެއްވާ ހާއްސަ އިނާމު ދެއްވުން ވެސް މާދަމާ ރޭ އޮންނާނެ އެވެ.

ރައީސް އޮފީހުން ބުނިގޮތުގައި، މި އަހަރު 40 ބޭފުޅަކަށް އިނާމު ދޭނެ އެވެ. ދައުލަތަށް ހިދުމަތް ކުރުމުގެ އިނާމު 53 ބޭފުޅަކަށް ދޭން ވެސް ވަނީ ހަމަޖެހިފަ އެވެ.