ގަވައިދާ ހިލާފަށް އުޅުނު 5،000 ބިދޭސީން ޑީޕޯޓު ކޮށްފިން: މިނިސްޓަރު

ހަސަން ހަލީމް

14 ނޮވެމްބަރ 2024 - 15:35

0 comments

ރާއްޖޭގައި ގަވައިދާ ހިލާފަށް އުޅޭ، 5،000އެއްހާ ބިދޭސީން މިދިޔަ އެއް އަހަރުގެ ތެރޭގައި އަނބުރާ ގައުމަށް ފޮނުވާލާފައިވާ ކަމަށް ހޯމްލޭންޑް މިނިސްޓަރު އަލީ އިހުސާން ރޭ ވިދާޅުވެއްޖެ އެވެ.

މި ސަރުކާރަށް އަންނަ އާދިއްތަ ދުވަހު އަހަރެއް ފުރޭތީ ޕީއެސްއެމް މެދުވެރިކޮށް ގެނެސްދިން "ހަފްތާ 52" ޕްރޮގްރާމުގައި މިނިސްޓަރު އިހުސާން ވިދާޅުވީ ރައީސްގެ އިރުޝާދާ އެއްގޮތަށް އަމަލު ކުރުމުން މިދިޔަ އެއް އަހަރު ތެރޭ ވަރަށް ކާމިޔާބު މަސައްކަތްތަކެއް ކުރެވިފައިވާ ކަމަށެވެ. މިނިސްޓަރު ފާހަގަ ކުރެއްވި އެއް ކަމަކީ ބިދޭސީންގެ މައްސަލަ ހައްލު ކުރުމަށް މިދިޔަ އަހަރުގެ ނޮވެމްބަރު 17 އިން ފެށިގެން ކުރި މަސައްކަތެކެވެ.

"ގަވައިދާ ހިލާފަށް ވިޔަފާރި، ކުދި ވިޔަފާރިތައް ކުރަމުން އައި، ކުށްތަކަށް އަރައިގަންނަމުން އައި ބިދޭސީން، އަޅުގަނޑުމެން ވާނީ ހިފާ ހައްޔަރުކޮށް 48 ގަޑިއިރު ތެރޭ ރާއްޖެއިން ބޭރު ކުރެވޭނެ ނިޒާމެއް ގާއިމް ކޮށްފައި،" އިހުސާން ވިދާޅުވި އެވެ.

ރާއްޖޭގައި ގަވައިދާ ހިލާފަށް އުޅެމުން ދިޔަ ބިދޭސީންގެ ތެރެއިން 5،000 އެއްހާ ބިދޭސީން މިދިޔަ އެއް އަހަރު ތެރޭ ޑީޕޯޓު ކޮށްފައިވާ ކަމަށް މިނިސްޓަރު ވިދާޅުވި އެވެ.

އޭނާ ވިދާޅުވީ އެ އޮޕަރޭޝަންގެ ދަށުން، 10،000 ބިދޭސީންގެ މައުލޫމާތު ހިމެނޭ 'ބަޔޯމެޓްރިކްސް' ނަގާފައިވާ ކަމަށެވެ. އަދި އަމާޒަކީ، އަންނަ އަހަރުގެ އޭޕްރީލް މަހުގެ ނިޔަލަށް ރާއްޖޭގެ ހުރިހާ ރަށެއްގައި އުޅޭ ބިދޭސީންގެ މައުލޫމާތު އެއްކުރުން ކަމުގައި ވިދާޅުވި އެވެ.

މި އޮޕަރޭޝަނާ ގުޅޭގޮތުން ގޮތުން މިނިސްޓަރު ކުރިން ވިދާޅުވީ ކުރަނގި އޮޕަރޭޝަނުގެ ފުރަތަމަ އަހަރުގައި، ރާއްޖޭގައި އުޅެނީ ކޮން ގައުމެއްގެ ކިތައް ބިދޭސީންކަން ދެނެގަނެވޭނެ ކަމަށެވެ. އަދި އެމީހުން މަސައްކަތްކުރާ ތަނާއި ހަވާލުވެގެން ތިބި މީހުން ވެސް އެނގޭނެ ކަމަށް ވިދާޅުވެފައި ވެ އެވެ.