ނަތަންޔާހޫ ހައްޔަރުކުރުމުގެ އަމުރު ރާއްޖޭން ތަންފީޒުކުރާނެ

އިސްމާއިލް ރިޒާ

28 ނޮވެމްބަރ 2024 - 22:36

0 comments

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރު ކުރަން އިންޓަނޭޝަނަލް ކްރިމިނަލް ކޯޓް (އައިސީސީ) އިން ނެރުނު އަމުރު ރާއްޖެއިން ތަންފީޒުކުރާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ޔަހޫދީންގެ ޣައިރު ޤާނޫނީ އަނިޔާވެރި ދައުލަތް އިސްރާއީލްގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ އާއި ކުރީގެ ޑިފެންސް ސެކެރެޓަރީ ޔޯވް ގަލަންޓް ހައްޔަރުކުރުމުގެ އަމުރެއް ބައިނަލްއަގުވާމީ ޖިނާއީ ކޯޓުން މީގެ ހަފްތާއެއް ކުރިން ވަނީ އަމުރެއް ނެރެފައެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ހިންގާފައިވާ ޖަރީމާތަކާ ގުޅިގެން އިސްރާއީލުގެ ލީޑަރުންނާއި ހަމާސްގެ ވެރިޔާގެ މައްޗަށް ހަނގުރާމައިގެ ގިނަ ޖަރީމާތަކާއި އިންސާނިއްޔަތާ ޚިލާފު ޖަރީމާތަކެއް ހިންގާފައިވާ ކަމުގެ ތުހުމަތު ކޮށްފައި ވެއެވެ.

އިހުސާން މިރޭ "އެކްސް"ގައި ކުރެއްވި ޕޯސްޓެއްގައި ވަނީ ރާއްޖެއަކީ އިންޓަނޭޝަނަލް ކޯޓުތަކުގެ އަމުރުތައް ވަކި މީހަކު އިސްތިސްނާ ނުކޮށް ތަންފީޒުކުރާނެ ޤައުމެއް ކަމަށް ވިދާޅުވެފަ އެވެ.

އައިސީސީ އަކީ ގަތުލުއާންމުތަކާއި އިންސާނިއްޔަތާ ހިލާފު ކުށްތަކާއި ހަނގުރާމައިގެ ކުށްތައް އަދި ގައުމުތަކަށް ފިޔަވަޅު ނޭޅޭ ނުވަތަ އަޅަން ބޭނުން ނުވާ މައްސަލަތައް ބަލާ ކޯޓެކެވެ. އައިސީސީގެ މެމްބަރު ގައުމުތަކުގެ ގޮތުގައި 124 ގައުމު އޮވެ އެވެ. މީގެ ތެރޭގައި ރަޝިޔާ، ޗައިނާ، އިޒްރޭލު، އިންޑިއާ އަދި އެމެރިކާއެއް ނުހިމެނެ އެވެ.