މަޖިލީސް ޗުއްޓީއަށް ދާނީ އިސްރާއީލު ޕާސްޕޯޓު ބިލާމެދު ގޮތެއް ނިންމާފަ: މުހައްމަދު

ހަސަން ހަލީމް

25 ނޮވެމްބަރ 2024 - 19:13

0 comments

ރައްޔިތުންގެ މަޖިލިސް މި ދައުރު ޗުއްޓީއަށް ދިއުމުގެ ކުރިން މިހާރު މަޖިލީހުގައި އޮތް އިސްރާއީލު ޕާސްޕޯޓު މަނާކުރުމުގެ ބިލާމެދު ގޮތެއް ނިންމާނެ ކަމުގައި ވިލިމާލޭ ދާއިރާގެ މެންބަރު މުހައްމަދު އިސްމާއީލު ވިދާޅުވެއްޖެ އެވެ.

އިސްރާއީލު ޕާސްޕޯޓު މަނާކުރުމަށް އިމިގްރޭޝަން ގާނޫނު އިސްލާހުކުރަން ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް ނަސީމެވެ. އޭނާ އެ އިސްލާހު ހުށަހަޅުއްވާފައިވަނިކޮށް ވަޒީރުންގެ މަޖިލީހުގެ ބައްދަލުވުމެއްގައި މަޝްވަރާކުރެއްވުމަށްފަހު އިސްރާއީލު ޕާސްޕޯޓު މަނާކުރަން ނިިންމެވީ ޖޫން މަހުގެ ދެވަނަ ދުވަހު އެވެ.

މީކާއީލު ހުށަހެޅުއްވި އިސްލާހު މަޖިލީހަށް ބަލައިގަތުމަށް ޕީއެންސީގެ މެންބަރުން ވޯޓު ދެއްވާފައިވަނިކޮށް ބަންޑާރަ ނައިބު އަހްމަދު އުޝާމުވަނީ އެއިރު ބިލު އޮތްގޮތަށް ފާސްކުރަން ފެނިވަޑައިނުގަންނަވާ ކަމަށާއި، އެއަށް ބައެއް އިސްލާހުތައް ގެންނަންޖެހޭކަމަށް ވިދާޅުވެފަ އެވެ.

ބިލު ބަލައިގަނެ ސަލާމަތީ ހިދުމަތްތަކާ ބެހޭ ކޮމިޓީއަށް ފޮނުވުމަށްފަހު ކޮމިޓީގައި ބިލުގެ މަސައްކަތެއް ނުހިނގައި ހަތަރު މަހެއްހައި ދުވަސްވުމަށްފަހު އެ ކޮމިޓީންވަނީ އަންނަ ފެބްރުއަރީ މަހުގައި ބިލުގެ މަސައްކަތް ނިންމުމަށް ފާސްކޮށްފަ އެވެ.

ރައްޔިތުންގެ މަޖިލީސް ކުރިމަތީގައި ޑރ. ޝަޒްރާ އިބްރާހިމްގެ ކުރެއްވި ސުވާލަަކަށް ޖަވާބުދެއްވަމުން މެންބަރު މުހައްމަދު އިސްމާއީލް ވިދާޅުވީ، މަޖިލިސް ބަންދު ދުވަހުގައިވެސް އިސްރާއީލުގެ ޕާސްޕޯޓްގެ މައްސަލަ އަވަސް ކުރަން ރައީސް ޑރ. މުހައްމަދު މުއިއްޒު އަންގަވައިގެން އެ ކޮމެޓީ ވަރަށް ބާރަށް ކުރިއަށް ގެންދާ ކަމަށެވެ.

"މާތްﷲ އިރާދަކުރެއްވިއްޔާ މި މަސް ނިމުމުގެ ކުރިން، މަޖިލީސް ރިސެސްއަށް ދިއުމުގެ ކުރިން، ތިއީ ވަރަށް ބޮޑު ކަމެއް އެނގޭތޯ، ތިއީ ކުޑަ ކަމެއް ނޫން، އަޅުގަނޑުމެން ކަހަލަ ކުޑަކުޑަ ގައުމަކަށް ތިވަރުގެ ބޮޑު ޑިޒިޝަނެއް ނަގާއިރު، ވަރަށް ގިނަ ފަރާތްތަކާއި ޑިސްކަން ކުރަން އެބަ ޖެހޭ،". ޝަޒްރާ ކުރެއްވި ސުވާލަށް ޖަވާބު ދެއްވަމުން އޭނާ ވިދާޅުވިއެވެ.

އަދި ފަތުރުވެރިކަމާއި ގުޅުން ހުރި ބޭބޭފުޅުންނާއި މަޝްވަރާ ކުުރުމަށް ފަހު ގައުމަށް އެންމެ ލޮޅުން ކުޑަ، އެންމެ އިގްތިސޯދީ ގޮތަށް އެންމެ އަސަރު ކުޑަވާނެ ގޮތަކަށް ކޮމެޓީން މަސައްކަތް ކުރަމުންދާ ކަމަށް މެންބަރު ވިދާޅުވިއެވެ.