ދުންފަތާ ދެކޮޅު ފިޔަވަޅުތަކާ ގުޅިގެން ރައީސް މުއިއްޒަށް ހާއްސަ އެވޯޑެއް

މަރިޔަމް އަނާ

19 މެއި 2025 - 19:45

0 comments

ދުންފަތާ ދެކޮޅަށް ކުރައްވާ މަސައްކަތްތަކުގެ އަގުވަޒަން ކުރުމުގެ ގޮތުން ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯގެ ޑިރެކްޓަ ޖެނެރަލް ދެއްވާ ހާއްސަ އެވޯޑެއް ރައީސް ޑރ. މުހައްމަދު މުއިއްޒަށް އަރުވައިފި އެވެ.

މި އެވޯޑަކީ ދުންފަތް ކޮންޓްރޯލް ކުރުމަށް އެންމެ ފާހަގަކޮށްލެވޭ މަސައްކަތްތަކެއް ކޮށްފައިވާ ފަރާތްތަކަށް ޑަބްލިއުއެޗްއޯ އިން ކޮންމެ އަހަރަކުވެސް ދޭ އެވޯޑެކެވެ.

މި އަހަރު އެވޯޑް ލިބޭ އެހެން ބޭފުޅުންގެ ތެރޭގައި މޮރިޝަސްގެ މިނިސްޓްރީ އޮފް ހެލްތު އެންޑް ވެލްނަސް ހިމެނެ އެވެ.

ދުންފަތާ ދެކޮޅަށް ކުރާ މަސައްކަތް ފާހަަގަކޮށް، ދުނިޔޭގެ އެކި ގައުމުތަކުން 36 ފަރާތަކަށް އެވޯޑު ދީފައިވެ އެވެ. އެކަމަކު އެންމެ ހާއްސަ އެވޯޑު ލިބިވަޑައިގެންނެވީ ރައީސް އަށާއި މޮރިޝަސް އަށެވެ.

2007 އިން ފެށިގެން އުފަންވެފައިވާ މީހުންނަށް ދުންފަތުގެ "ޖެނެރޭޝަން ބޭން"އެއް ކަނޑައެޅުމަށް ފާސްކޮށްފައިވާތީ، އެކަމަށް ޑަބްލިއުއެޗްއޯއިން ކުރިން ވަނީ މަރުހަބާ ކިޔާފަ އެވެ. އެކަން، އެ ޖަމިއްޔާއިން ސިފަކުރީ، "ޖެހިލުން ކުޑަ" ނިންމުމެއްގެ ގޮތުގަ އެވެ.

ރައީސް ޑރ. މުއިއްޒުގެ ސަރުކާރުން ވަނީ ދުންފަތާ ދެކޮޅަށް ހަރުކަށި ފިޔަވަޅުތަކެއް މިހާތަނަށް އަޅާފަ އެވެ. މީގެ ތެރޭގައި ރާއްޖޭގައި ވޭޕް ބުއިމާއި ވިއްކުން މަނާކުރުމާއި ސިނގިރޭޓްގެ ޑިއުޓީ ބޮޑުކުރުމާއި، 2007 ވަނަ އަހަރުން ފެށިގެން އުފަންވެފައިވާ އަދި އުފަން ވާނެ ކުދިންނަށް ދުންފަތް މަނާކުރުމަށް ވަނީ ނިންމައިފަ އެވެ.

ދުންފަތުގެ ވިޔަފާރި ކުރާ ފަރާތްތަކުން އެ ވިޔަފާރި ހުއްޓާލައި ފައިދާ ހުރި އެހެން މަސައްކަތެއް ކުރުމަށްވެސް ރައީސް އެދިވަޑައިގެންފައިވެ އެވެ.