އިޒްރޭލު ޕާސްޕޯޓު މަނާކުރާ ބިލުގެ ކޮމިޓީ މަރުހަލާ އަވަސްކުރަން ފާސްކޮށްފި

އަލީ ރާޒީ

24 ނޮވެމްބަރ 2024 - 11:54

0 comments

އިޒްރޭލު ޕާސްޕޯޓު މަނާ ކުރަން ގޮވާލާ ކުރި އިހުތިޖާޖުގެ ތެރެއިން -- ފޮޓޯ: މިހާރު

އިސްރާއީލު ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އެމްޑީޕީގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް އަވަސްކުރަން ސަލާމަތީ ހިދުމަތްތަކާ ބެހޭ ކޮމެޓީ (241 ކޮމެޓީ) އިން ނިންމައިފި އެވެ.

އިޒްރޭލުގެ ޕާސްޕޯޓު އޮންނަ މީހުން ރާއްޖެ އަށް އެތެރެވުން މަނާކުރުމަށް އިމިގްރޭޝަން ގާނޫނު ބަދަލުކުރަން ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމެވެ. މިދިޔަ މޭ 29 ވަނަ ދުވަހު ހުށަހެޅި ބިލް ބަލައިގަނެ ކޮމިޓީ އަށް ފޮނުވި ފަހުން، އެ ބިލް އަދިވެސް އޮތީ ކޮމިޓީ މަރުހަލާގަ އެވެ.

ގިނަ ދުވަސްތަކަކަށް ކޮމިޓީގައި ބިލު ޕާކުކޮށްފައި ބޭއްވުމަށް ފަހު، ބިލް ނިންމާނެ ސުންގަޑިއެއްގެ ގޮތުގައި ކޮމިޓީން ކަނޑައެޅީ އަންނަ އަހަރުގެ ފެބްރުއަރީ މަހުގެ ނިޔަލަށެވެ.

އޭގެ ފަހުން ބޭއްވި ކޮމިޓީގައި ވަނީ މި ބަދަލު ގެނައުމަށް ހުރިހާ ސިޔާސީ ޕާޓީތަކާއި އެޓާނީ ޖެނެރަލްގެ އޮފީހާއި އިކޮނޮމިކް މިނިސްޓްރީ އާއި ޓޫރިޒަމް މިނިސްޓްރީ އާއި ޓްރާންސްޕޯޓް މިނިސްޓްރީ އާއި އިމިގްރޭޝަން އަދި މަޓީ އާއި އެހެނިހެން އެންޖީއޯތަކާ މަޝްވަރާ ކުރުމުގެ މަސައްކަތް އަންނަ ޑިސެމްބަރު މަހުގެ ނިޔަލަށް ސިޓީ ފޮނުވުމަށް ނިންމައިފަ އެވެ.

241 ކޮމިޓީން މިއަދު ބޭއްވި ބައްދަލުވުމުގައި އެ ކޮމިޓީގެ މުގައްރިރު، އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް) ވިދާޅުވީ ކުރިން ނިންމާފައިވާ ސުންގަޑި އަށް ވުރެ ބިލްގެ މަސައްކަތް އަވަސް ކުރުމަށްޓަކައި އިދާރީ ބައެއް ބަދަލުތައް ގެންނަން ޖެހިފައިވާ ކަމަށެވެ.

އެހެންވެ، ކޮމިޓީން ކުރިން ފާސްކޮށްފައި އޮތް ގޮތް ބަދަލުކޮށް، މާދަމާ އިން ފެށިގެން ކަމާ ގުޅުން ހުރި އިދާރާތައް ހާޒިރުކޮށް ނިންމުމަށް ކޮމިޓީން މިއަދު ވަނީ ފާސްކޮށްފަ އެވެ.

އެ ބިލު މަޖިލީހަށް ބަލައިގެންފައި ވަނީ ޖޫން މަހުގެ 10 ވަނަ ދުވަހު އެވެ. އެދުވަހު ބިލު ކޮމެޓީއަށް ފޮނުވި ގޮތަށް އޮތީ މަޑުޖެހިފަ އެވެ. މީކާއިލް ހުށަހެޅުއްވީ އިމިގްރޭޝަން ގާނޫނަށް އިސްލާހު ގެނައުމަށެވެ.

އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރަން ގާނޫނުތައް ބަދަލުކުރުމަށް ރައީސް މުއިއްޒުގެ ސަރުކާރުން ނިންމާ އެކަން އިއުލާނުކުރީ ޖޫން 2، ގަ އެވެ.

އެ ބިލުގެ މަސައްކަތް ދިގު ދަންމާލަން ނިންމާފައިވާއިރު، އިދިކޮޅުން ހުށަހެޅި ބިލަށް ބަދަލުތަކެއް ގެންނަ ޖެހޭ ކަމަށް އެޓާނީ ޖެނެރަލް އަހުމަދު އުޝާމް ވަނީ ވިދާޅުވެފަ އެވެ.

"މިހާރު ހުށަހަޅާފަ އޮތް ބިލަށް ކޮންމެވެސް ވަރެއްގެ ބަދަލެއް ގެންނަންޖެހޭ. ދެން ކެބިނެޓުގަ ނިންމާފަ އޮތް ނިންމުންތަކާ އެއްގޮތަށް ބިލު އިސްލާހުކޮށްގެން މަޖިލީހުން ކުރިއަށް ގެންދަން ޖެހޭނީ،" ޖޫން 6، ގައި އުޝާމް ވިދާޅުވި އެވެ.