އަރަބް-އިސްލާމިކް ސަމިޓަށް ރައީސް ސައުދީއަށް ވަޑައިގަންނަވައިފި

އަލީ ރާޒީ

11 ނޮވެމްބަރ 2024 - 10:18

0 comments

އޯގަނައިޒޭޝަން އޮފް އިސްލާމިކް ކޯޕަރޭޝަން (އައިއޯސީ) ގެ ކުއްލި ބައްދަލުވުމަކާއި ކޮޕް 29 ސަމިޓުގައި ބައިވެރިވަޑައިގަތުމަށް ރައީސް ޑރ. މުހައްމަދު މުއިއްޒު ސައުދީ އަރަބިއްޔާ އަދި އަޒަރުބައިޖާން އަށް ފުރާވަޑައިގަންނަވާނެކަން އެމަނިކުފާނު އިއުލާނުކުރައްވައިފި އެވެ.

ޖުމްހުރީ ދުވަހުގެ ރަސްމީ ޖަލްސާގައި ވާހަކަ ދައްކަވަމުން ރައީސް ވިދާޅުވީ، މި ދަތުރުގައި އެމަނިކުފާނު ފުރާވަޑައިގަންނަވާނީ މިރޭ ދަންވަރު ކަމަށެވެ. އެންމެ ފުރަތަމަ ވަޑައިގަންނަވަނީ ސައުދީއަށެވެ. ރައީސް ވިދާޅުވީ އެމަނިކުފާނު ވަޑައިގަންނަވަނީ ސައުދީ ރަސްގެފާނު ފޮނުއްވި ހާއްސަ ފުލައިޓެއްގައި ކަމަށެވެ.

ސައުދީގެ ރިޔާދުގައި އިސްލާމީ ގައުމުތަކުގެ ވެރިން އެއްވެ ބާއްވާ "އެކްސްޓްރާއޯޑިނަރީ ޖޮއިންޓް އަރަބް-އިސްލާމިކް ސަމިޓް" އޮންނާނީ މިއަދު އެވެ.

ރައީސުލްޖުމްހޫރިއްޔާގެ މި ދަތުރުފުޅަކީ ސަޢުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒްގެ ދަޢުވަތަކަށް، ޖޮއިންޓް ޢަރަބް-އިސްލާމިކް ސަމިޓުގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. މިސަމިޓުގައި ރައީސުލްޖުމްހޫރިއްޔާ ތަޤުރީރުކުރައްވާނީ މިއަދު މެންދުރުގެ ވަގުތެއްގައެވެ.

މިސަމިޓުގައި އިސްރާއީލުގެ އިސްތިޢުމާރީ ބާރުތަކުން ފަލަސްޠީނާއި ލުބްނާނަށް ދެމުންދާ ހަމަލާތަކާއި، ސަރަޙައްދީ ޙުތޫރަތްތެރި މައްސަލަތަކާމެދު، ސަރަޙައްދީ އިސްވާރުން ކުރައްވާ މަޝްވަރާގައި ރައީސުލްޖުމްހޫރިއްޔާ ބައިވެރިވެވަޑައިގަންނަވާނެއެވެ. މިސަމިޓުގައި މަޝްވަރާތައް ބިނާކުރައްވާނީ، 2023 ވަނަ އަހަރުގެ ނޮވެމްބަރ މަހުގެ 11 ވަނަ ދުވަހު ސަޢޫދީ ޢަރަބިއްޔާގެ ރިޔާޛުގައި ނިންމި ޖޮއިންޓް ޢަރަބް-އިސްލާމިކް ސަމިޓުގެ ނިންމުންތަކުގެ މައްޗަށެވެ.

މިދަތުރުފުޅަށްފަހު ރައީސް ދެން ވަޑައިގަންނަވާނީ ކޮޕް ސަމިޓްގައި ބައިވެރިވެވަޑައިގަތުމަށް އަޒަރުބައިޖާންއަށެވެ.