ކޮވިޑުގައި ލިބުނު 4 ބިލިއަނަށް ވީގޮތެއް ނޭނގޭ

މަރިޔަމް އަނާ

14 ނޮވެމްބަރ 2024 - 09:39

0 comments

މިދިޔަ ސަރުކާރުގައި ކޮވިޑް-19އާ ގުޅިގެން ބޭރުގެ އެކި ބޭންކުތަކުންނާއި ޤައުމުތަކާއި ޖަމާއަތްތަކުން ހިލޭ އެހީގެ ގޮތުގައި ދިން ފައިސާއިން 4 ބިލިޔަން ރުފިޔާއަށް ވީގޮތެއް ނޭނގޭކަމަށް އިޤްތިޞާދީ ތަރައްދީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެ އެވެ.

ވަޒީރު ސައީދު މިހެން ވިދާޅުވީ "ހަފްތާ52"ގެ ނަމުގައި ގެނެސްދިން ހާއްސަ ޕެނަލް ޑިސްކަޝަންގައި ވާހަކަފުޅުދައްކަވަމުންނެވެ.

ސައީދު ވިދާޅުވީ ކޮވިޑް މެނޭޖްކުރުމަށްޓަކާ އެކުވެރި ދައުލަތްތަކުންނާއި އެކި އިދާރާތަކުން އޭރުގެ ސަރުކާރާއި 565 މިލިއަން ޑޮލަރު ނުވަތަ 8.7 ބިލިއަން ރުފިޔާގެ ހިލޭ އެހީ ހަވާލުކޮށްފައިވާ ކަމަށެވެ.

ކުރީ ސަރުކާރުން ހަދާފައިވާ އެކްސްޕެންޑިޗާ ރިޕޯޓްތަކުން ދައްކާ ގޮތުގައި ކޮވިޑަށް ކުރި ހަރަދު ކަމަށް ބުނާ އަދަދަކީ 4.2 ބިލިއަން ރުފިޔާ ކަމަށާއި ނަމަވެސް އަނެއް 4 ބިލިއަން ރުފިޔާ އަށް ވީގޮތެއް ނޭނގޭ ކަމަށް ސައީދު ވިދާޅުވި އެވެ.

"އަޅުގަނޑުގެ ސުވާލަކީ ކޮބާހޭ ކޮވިޑަށް ލިބުނު އަނެއް 4 ބިލިޔަން ރުފިޔާ. އެ ފައިސާ ދިޔައީ ކޮންބައެއްގެ އެކައުންޓްތަކަށްތޯ އެ ފައިސާ ދިޔައީ. މި ކަންކަން ނުބެލޭކަމަށްވަންޏާ ރައްޔިތުންގެ އިތުބާރު އެބަޔަކާ ދޭތެރޭގައި ގެއްލިގެންދާތަން މާޒީގައި ފެނިފައި އޮތީ،" ސައީދު ވިދާޅުވި އެވެ.

ސައީދު ވިދާޅުވީ، ކޮވިޑާ ބެހޭ އޮޑިޓެއް ސަރުކާރުން ހަދަމުންދާ ކަމަށާއި އެ އޮޑިޓް ނިމުމުން ވީ ހިޔާނާތުގެ ތަފްސީލު އެނގިގެންދާނެކަމަށެވެ.

ވަޒީރު ސައީދު ވަނީ ރާއްޖޭގެ އިގްތިސާދީ ހާލަތާއި ގުޅޭގޮތުން ވާހަކަ ދައްކަވާފަ އެވެ. އަދި ނުރައްކާތެރި އިގްތިސާދީ ހާލަތަކުން އަރައިގެންނެވުމަށް ރައީސް ކުރެއްވި މަސައްކަތްޕުޅުތަކަށް ވަޒީރު ވަނި ތައުރީފު ކުރައްވާފަ އެވެ.

އަންނަ އަހަރު ރާއްޖޭގައި ވަރަށް ހަރަކާތްތެރި އިގްތިސާދެއް އޮންނާނެކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވި އެވެ.