ގަވާއިދާ ހިލާފަށް ވިޔަފާރިކުރާ ބިދޭސީންގެ އެކައުންޓްތަކުގައި ފައިސާ ދައުރުކުރާ ގޮތް ބަލަނީ

ހުނައިދާ ޔާސިރު

12 މެއި 2026 - 11:57

0 comments

ގަވާއިދާ ހިލާފަށް ބިދޭސީން ވިޔަފާރިކުރާތީ ބޭންކު އެކައުންޓުގައި ފައިސާ ދައުރުކުރާ ގޮތް ވަރަށް އަވަހަށް ބަލަން ފަށާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ސަރުކާރުގެ ވުޒާރާތަކުން ބިދޭސީ ވިޔަފާރި ހުއްޓުވަން ކުރަމުން ގެންދާ މަސައްކަތްތަކާ ބެހޭ ގޮތުން ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވި ގޮތުގައި ގަވައިދާ ހިލާފަށް ބިދޭސީން ވިޔަފާރިކުރާކަމުގެ ޝަކުވާއާއެކު އެ މިނިސްޓްރީން ހިންގާ އިންސްޕެކްޓްތަކުން އެނގޭ އެއް ކަމަކީ މިފަދަ ވިޔަފާރިތަކުގެ "އަސްލު އޯނަރުން" ގެ ގޮތުގައި ހުންނަނީ ދިވެއްސެކެވެ. އެހެންކަމުން ޕްރައިވެޓް ސެކްޓަރުގެ ހިމެނޭ ބިޒްނަސް ކައުންސިލްގެ ލަފާގެ މަތިން މިފަދަ ބިދޭސީ "ވަގު ވިޔަފާރި" ތައް ހިފަން ކުރިން ގެންގުޅުނު އުކުޅުތައް ބަދަލު ކުރަން ވަނީ ނިންމާފަ އެވެ.

މިނިސްޓަރު ވިދާޅުވީ މިފަދަ އޮޕަރޭޝަނަށް ގެންނަ ބަދަލާއެކު މީރާ އާއި ބޭންކާ ގުޅިގެން އެކައުންޓް ދައުރުވާ ގޮތް ބަލަން ވަނީ ނިންމާފަ އެވެ.

"ދުވަސްކޮޅަކުން އެނގޭނެ އެ ފައިސާ އަސްލު ދައުރުވަނީ ބިދޭސީ އެކައުންޓެއްގަ ތޯ؟ ކިހާވަރެއްގެ ލިންކޭޖެއް އިނދޭ ތޯ މި ނެޓްވޯކުގެ ތެރޭގައި މިފަދަ ވިޔަފާރިތަކުގަ. މީގައި ހޯމްލޭންޑް މިނިސްޓްރީ އާއި އެމްއެމްއޭ ހިމެނޭނެ. މިއީ ކުރިން ބެލި ބެލުން ތަކާ ހިލާފަށް ފުންކޮށް ކުރާނެ މަސައްކަތެއް،" ސައީދު ވިދާޅުވި އެވެ.

ފާހަގަކުރެވޭ ގޮތުގައި، މި ސަރުކާރުން ވަނީ، ގަވައިދާ ޚިލާފަށް އުޅޭ ބިދޭސީން ގަވައިދަށް ފައްތައި، ބިދޭސީންގެ މައުލޫމާތު އެއްކުރުމަށްޓަކައި "އޮޕަރޭޝަން ކުރަނގި"ގެ ނަމުގައި ބޮޑު އޮޕަރޭޝަނެއް ފަށައިފައެވެ. އެ މަސައްކަތުގެ ތިންވަނަ ފިޔަވަހީގެ ދަށުން މިދިޔަ ހޮނިހިރު ދުވަހު އެކަނިވެސް 1،344 ބިދޭސީންނާ ސުވާލުކޮށްފައިވާ ކަމަށް، ކޮންޓްރޯލާ ޖެނެރަލް އަޙްމަދު ފަސީޙް ވިދާޅުވެފައިވެއެވެ.

އެ އޮޕަރޭޝަނާ ގުޅޭ ގޮތުން އެކްސްގައި ކުރެއްވި ޕޯސްޓެއްގައި ރައީސް ޑރ. މުޙައްމަދު މުއިއްޒު ވަނީ، ބިދޭސީ މަސައްކަތްތެރިންގެ ތެރެއިން 98 އިންސައްތަ މީހުންގެ 10 އިނގިލީގެ ނިޝާނާއި ސާފު ފޮޓޯ މިހާރު ނަގައިފައިވާ ކަމަށް ހާމަކުރައްވައިފައެވެ.

އަދި ގަވާއިދާ ޚިލާފަށް ރާއްޖޭގައި އުޅެމުންދާ ބިދޭސީންގެ މައްސަލައަށް ދާއިމީ ހައްލެއް ގެނައުމަށް ކުރެވޭ މަސައްކަތުގެ ތެރެއިން، ކުރިއަށް އޮތް ހަ މަސް ދުވަހުގެ ތެރޭގައި ބާކީ ތިބި މީހުން ހޯދައި ރާއްޖޭން ޑިޕޯޓުކުރުމުގެ މަސައްކަތްތައް ކުރިއަށްދާނެ ކަމަށް އެ މަނިކުފާނު ވަނީ ލިޔުއްވައިފައެވެ.

އެކަމާ ގުޅުވައި، ހޯމްލޭންޑް ސެކިއުރިޓީ މިނިސްޓަރު ޢަލީ އިޙްސާން ވިދާޅުވީ، ރަށްރަށުގައި 2،800 އެއްހާ ބިދޭސީން އަދިވެސް މައުލޫމާތު ނުދީ އެބަ ތިބި ކަމަށާއި، އެ ބިދޭސީން ހޯދައި ކުރިއަށް އޮތް ހަ މަހުގެ ތެރޭ އެ މީހުންގެ ގައުމުތަކަށް އަނބުރާ ފޮނުވައިލާނެ ކަމަށެވެ. އެ މަސައްކަތް ވަރަށް އަވަހަށް ފަށާނެ ކަމަށް، އިޙްސާން ވިދާޅުވިއެވެ.