ޑޮލަރުގެ އަގު އުފުލޭ މައްސަލަ މިފަހަރު ސައީދު ޖެހީ، ނޫސްވެރިންގެ ބޮލަށް!

ހުނައިދާ ޔާސިރު

11 އޯގަސްޓް 2026 - 10:54

0 comments

ރާއްޖޭގައި ޑޮލަރުގެ ކަޅުބާޒާރެއް އޮންނަކަން ގަބޫލު ކުރައްވާ، އެ ބާޒާރުގައި ޑޮލަރުގެ އަގު ކޮންމެ ދުވަހަކު އުފުލެނީ ބައެއް ނޫސްތަކުގައި ޖަހާ ސުރުހީތަކުގެ ސަބަބުން ކަމަށް އިކޮނޮމިކް މިނިސްޓަރު މުހައްމަދު ސައީދު ރޭ ވިދާޅުވެއްޖެ އެވެ.

ދައުލަތުގެ މީޑިއާ މެދުވެރިކޮށް ރޭ ގެނެސްދިން 'އިގްތިސޯދުގެ ދެ ފަރާތް' ފޯރަމްގައި ވާހަކަދައްކަވަމުން މިނިސްޓަރު ސައީދު ވިދާޅުވީ ޑޮލަރުގެ އަގު އެއް ދުވަހު 21 ރުފިޔާގައި އަދި އަނެއް ދުވަހު 22 ނުވަތަ 23 ރުފިޔާގައި އުޅޭ ކަމަށް އަޑުއިވިވަޑައިގަންނަވާ ކަމަށެވެ.

އަދި ބައެއް ނޫސްތަކުގެ ހެޑްލައިންތަކުގައި ހެނދުނު ހޭލާއިރު މިއަދުގެ ރޭޓަކީ 22 ރުފިޔާ ކަމަށް ޖަހާފައި ހުންނަކަން ފާހަގަކުރައްވައި، މިނިސްޓަރު ވަނީ އެފަދަ ސުރުހީތަކަކީ "ޕެނިކް އުފައްދައި"، "ފޭކް ނިއުސް" ފަތުރައި "މެނިޕިއުލޭޓް" ކުރުމަށް ޖަހާ ސުރުހީތަކެއްގެ ގޮތުގައި ސިފަކުރައްވާފަ އެވެ.

މިނިސްޓަރު ސިފަކުރެއްވި ގޮތުގައި، ނޫސްތަކުން އެފަދަ ސުރުހީތައް ޖަހަނީ "ޕެނިކް އުފައްދާ"، "ފޭކް ނިއުސް" ފަތުރައި "މެނިޕިއުލޭޓް" ކުރުމަށެވެ.

"އެހެން ހެދީމާ މިކަހަލަ ކުޑަ އިކޮނޮމީއެއްގައި ނަގަން ޖެހޭ ބްލަންޓު ބޮޑުވާނެ،" މިނިސްޓަރު ވިދާޅުވި އެވެ.

ރައީސް ޑރ. މުއިއްޒާއި އިކޮނޮމިކް މިނިސްޓަރު ސައީދުގެ އިތުރުން ސަރުކާރުގެ އިސް އެތައް ފަރާތެއް، ޑޮލަރުގެ އަގު ދެން އިތުރަށް މައްޗަށް ނުދާނެ ކަމަށް ވަނީ މީގެ ކުރިން އެތައް މުނާސަބަތެއްގައި ވިދާޅުވެފަ އެވެ. ޑޮލަރުގެ އަގު ދަށްކޮށް، ދިވެހި ފައިސާގެ އަގު މައްޗަށް އެރުވުމަށާއި އިގްތިސާދު ހަމައަކަށް އެޅުވުމަށް މަސައްކަތް ކުރަމުންދާކަމަށް ރައީސް މުއިއްޒުގެ ސަރުކާރުން ތަކުރާރުކޮށް ބުނަމުން އައިނަމަވެސް ޑޮލަރު ރޭޓު ހިފެހެއްޓުމެއްނެތި މައްޗަށް ދިއުމުން ސަރުކާރުން ދައްކަމުންދާ ވާހަކަތަކާމެދު ވަނީ ސުވާލު އުފެދިފަ އެވެ.

ރާއްޖޭގައި ޑޮލަރުގެ ރަސްމީ އަގަކީ 15.42ރ. އެވެ. ނަމަވެސް ބޭރު ފައިސާގެ ވިޔަފާރި ކުރާ ތަންތަނުން އަދި ކަޅުބާޒާރުގައި ވެސް ޑޮލަރު ވިއްކަނީ ރަސްމީ ރޭޓަށް ވުރެ ބޮޑުކޮށެވެ. މި ހަފްތާ ފެށުނުއިރު ޑޮލަރެއް ގަންނަން ލިބޭ އަގު ހުރީ 22.10ރ.އަށް އަރައިފަ އެވެ.