ގައުމު އޮތީ އިޒްރޭލު ޕާސްޕޯޓް މަނާކުރާ ހާލަތުގައި ނޫން: ސައުދުﷲ

މަރިޔަމް އަނާ

20 ނޮވެމްބަރ 2024 - 11:27

0 comments

ރާއްޖޭގެ ހާލަތު އޮތީ އެއްވެސް ގައުމަކާ ޖެހިގަނެގެން އުޅެވޭ ގޮތަށް ނޫން ކަމަށާއި އިޒްރޭލް ޕާސްޕޯޓު މަނާކުރުމާ މެދު އިތުރަށް ވިސްނާލަން ޖެހޭ ކަމަށް ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ މިއަދު ވިދާޅުވެއްޖެ އެވެ.

އިޒްރޭލްގެ ޕާސްޕޯޓްގައި ރާއްޖެއަށް އެތެރެވުން މަނާކުރުމަށް އިމިގްރޭޝަންގެ ގާނޫނަށް ހުށަހަޅާފައިވާ އިސްލާހު އަވަހަށް ފާސްކުރުމަށް ބާރު އަޅަން ސަރުކާރަށް ގޮވާލައި އެމްޑީޕީން ހުށަހެޅި ގަރާރުގެ ބަހުސްގައި ސައުދުﷲ ވިދާޅުވީ އަރަބި ގައުމުތަކުން ނާޅާ ފިޔަވަޅެއް ރާއްޖެއިން އަޅާއިރު ދިވެހި ރައްޔިތުންނާމެދު ވިސްނަން ޖެހޭ ކަމަށެވެ.

"އިޒްރޭލްގެ ޕާސްޕޯޓް މަނާކުރީމަ އަޅުގަނޑުމެންގެ ރާއްޖެއަށް ވާނީ ފައިދާތޯ ގެއްލުންތޯ ވެސް އެކަން ނިންމުމުގެ ކުރިން އަޅުގަނޑުމެން ވިސްނަންޖެހޭ،" ސައުދުﷲ ވިދާޅުވި އެވެ.

ރާއްޖެ އޮތީ އެއްވެސް ގައުމަކާ "ޖެހިގަނެގެން" އުޅެވޭ ފަދަ ހާލަތެއްގައި ނޫން ކަމަށް އޭނާ ވިދާޅުވި އެވެ.

އިޒްރޭލުގެ ރައްޔިތުން ރާއްޖެ އައުން މަނާކުރާ އިރު އެތަނުގައި ވެސް މުސްލިމުން އުޅޭ ކަމަށާއި އެ މީހުން ރާއްޖެ އައުން މަނާކުރަން ޖެހޭ ކަމަށް ގަބޫލު ނުކުރައްވާ ކަމަށް ސައުދުﷲ ވިދާޅުވި އެވެ.

"އެ މީހުން ބޮޑުވަޒީރު ކަމަށް ގެންނަން ވޯޓު ދިނީ ބެންޖަމިން ނަތަންޔާހޫ އަށް ކަމަށް އަޅުގަނޑަކަށް ގަބޫލެއް ނުކުރެވޭ. އަދި މަޖިލީހަށް ވޯޓު ދޭން ވޯޓު ދިނީ ވެސް އެފަދަ ޔަހޫދީންތަކަކަށް ކަމަށް ގަބޫލެއް ނުކުރެވޭ. އެހެންވީމަ އެ މީހުންގެ ހައްގުތަކަށް އަރައިގަންނަން އަޅުގަނޑުމެން ފުރުސަތު ދީގެން ނުވާނެ،" ސައުދުﷲ ވިދާޅުވި އެވެ.

ސައުދުﷲ ވިދާޅުވި ގޮތުގައި 20 ވަނަ މަޖިލީހުން ފަލަސްތީނުގެ ރައްޔިތުންގެ ހައްގުގައި އަޑު އިއްވައި އެ އަނިޔާވެރިކަމާ ކަނޑައެޅިގެން ދެކޮޅު ހަދާ ކަމުގެ ގަރާރެއް ނަމަވެސް ފާސް ކުރަން ވަރަށް ބޮޑަށް ތާއީދު ކުރައްވާ ކަމަށެވެ.

އިޒްރޭލު ޕާސްޕޯޓްގައި ރާއްޖެއަށް އައުން މަނާކުރުމަށް އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް އެވެ.

އެ ބިލްގެ މަސައްކަތް އަވަސްކުރަން ގޮވާލާ ގަރާރެއް ހުށަހެޅުއްވީ އިދިކޮޅު އެމްޑީޕީގެ ގަލޮޅު އުތުރު ދާއިރާގެ މުހައްމަދު އިބްރާހީމް އެވެ.