އިޒްރޭލު ޕާސްޕޯޓް މަނާ ކުރުން އަންނަ އަހަރަށް ފަސްކޮށްފި

އިސްމާއިލް ރިޒާ

12 ނޮވެމްބަރ 2024 - 14:25

0 comments

ސަލާމަތީ ޚިދުމަތްތަކާ ބެހޭ ކޮމިޓީ ގެ ބައްދަލުވުމެއްގެ ތެރެއިން:

އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރުމަށް ހުށަހަޅާފައިވާ އިސްލާހުގެ މަސައްކަތް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީން އަންނަ އަހަރުގެ ފެބްރުއަރީ މަހާ ހަމައަށް ދަންމާލަން މިއަދު ފާސްކޮށްފި އެވެ.

މިއަދުގެ 241 ކޮމިޓީއަށް އެ ހުށަހެޅުން ހުށަހެޅުއްވީ ތުޅާދޫ ދާއިރާގެ މެންބަރު އަބްދުލް ހަންނާނެވެ. އެ ހުށަހެޅުމަށް ތާއީދުކުރެއްވީ މާފަންނު އުތުރު ދާއިރާގެ މެންބަރު މުހައްމަދު ނާޒިމެވެ.

އެއާއެކު ކޮމިޓީން ނިންމީ ކަމާ ގުޅުން ހުރި އިދާރާތަކާ ބައްދަލުކޮށް، މަޝްވަރާ ބައްދަލުވުންތައް ބޭއްވުމަށެވެ.

އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރުމަށް ހުށަހަޅާފައި އޮތް ބިލުގެ މަސައްކަތް ލަސްވާތީ އެކަމާ ކަންބޮޑުވުން ފާޅުކޮށް، އެ ބިލު އަވަހަށް ފާސްކުރުމަށް ބާރުއަޅައިދިނުމަށް ސަރުކާރަށް ގޮވާލައި އިދިކޮޅު އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ވަނީ ގަރާރެއް ވެސް ހުށަހަޅައިފި އެވެ.

މިއަދުގެ ޖަލްސާއަށް އެ ގަރާރު ތައާރަފުކުރިއިރު، ގަރާރު ހުށަހަޅުއްވާފައި ވަނީ މިދިޔަ މަހުގެ 28ގައެވެ.

މި އަހަރުގެ ޖޫން މަހުގެ 10 ގައި ބިލް މަޖިލީހަށް ބަލައިގަތުމަށް ފާސްކޮށް، 241 ކޮމިޓީއަށް ފޮނުވި ނަމަވެސް ކޮޓީގައި އެ އޮންނަތާ ފަސް މަސްވެގެން ދިޔައިރު އޭގެ މަސައްކަތް ލަސްވާތީ އެމްޑީޕީ އާއި އާންމުން ވެސް އަންނަނީ ކަންބޮޑުވުން ފާޅުކުރަމުންނެވެ.

އެކަމަކު ކޮމިޓީ އަށް ވެސް އެ ބިލުގެ މައްސަލަ އެޖެންޑާނުކޮށް އޮތުމަށް ފަހު، މައްސަލަ ވަނީ އެޖެންޑާކުރީ މިދިޔަ އާދިއްތަ ދުވަހު އެވެ.

މި ބިލުގެ މަސައްކަތް ފެށުމަށް މިއަދު 241 ކޮމެޓީ ބައްދަލުވުމެއް ވަނީ ބާއްވާފަ އެވެ. މި ބައްދަލުވުމުގައި، ބިލުގެ މަސައްކަތް ނިންމާނެ ސުންގަޑިއެއް ވަނީ ކަނޑައަޅާފަ އެވެ.

ބިލުގެ މަސައްކަތް އަންނަ އަހަރުގެ ފެބްރުއަރީގެ ނިޔަލަށް ނިންމުމަށް ކޮމެޓީއަށް ހުށަހެޅުއްވީ ތުޅާދޫ ދާއިރާގެ މެންބަރު އަބްދުލްހަންނާނެވެ. އޭނާ ވިދާޅުވީ މިއީ ވަރަށް ހައްސާސް މައްސަލައަކަށްވާތީ ވަރަށް ގިނަ ފަރާތްތަކާ މަޝްވަރާ ކުރަން ތިބި ކަމަށް ގަބޫލު ކުރައްވާ ކަމަށެވެ. އަދި އަންނަ އަހަރަށް ލަފާ ކުރާ ބަޖެޓުގެ މަސައްކަތް ވެސް ކުރިއަށް އޮތް އިރު، އަންނަ މަހު މަޖިލީސް ޗުއްޓީއަށް ވެސް ދާނެކަން އޭނާ ފާހަގަކުރެއްވި އެވެ.

އަބްދުލްހަންނާންގެ ހުށަހެޅުން ކޮމެޓީން ފާސްކޮށްފައި ވަނީ ހުރިހާ މެންބަރުންގެ އިއްތިފާގުންނެވެ.