ބަޖެޓް ބަހުސް މިރޭ 11 ޖަހަންދެން ކުރިއަށް ގެންދަނީ

އިސްމާއިލް ރިޒާ

13 ނޮވެމްބަރ 2024 - 11:52

0 comments

އަންނަ އަހަރަށް ލަފާކުރާ ދައުލަތުގެ ބަޖެޓްގެ ބަހުސް މިރޭ 11:00 އާ ހަމައަށް ކުރިއަށް ގެންދަން ރައްޔިތުންގެ މަޖިލީހުން ފާސްކޮށްފި އެވެ.

ބަޖެޓު ބަހުސް ނިންމުމަށް ވަގުތު އިތުރުކުރަން ހުށަހެޅުއްވީ ރިޔާސަތުންނެވެ. މަޖިލީހުގެ ރައީސް އަބްދުއްރަހީމް އަބްދުﷲ ހުށަހެޅުއްވީ މިއަދު ބަޖެޓަށް ބަހުސް ކުރައްވަން ބޭނުންވާ ހުރިހާ މެންބަރުންނަށް ފުރުސަތު ދިނުމަށް މިރޭ 11 ޖަހަންދެން ޖަލްސާ ކުރިއަށް ގެންދިއުމަށެވެ.

އަދި މާދަމާގެ ޖަލްސާގައި ވެސް ބަޖެޓަށް ބަހުސް ކުރަން އެދިވަޑައިގަންނަވާ ހުރިހާ މެންބަރުންނަށް ފުރުސަތު ދިނުމަށް ޖަލްސާ ދަންމާލަން ހުށަހެޅުއްވި އެވެ. ޖަލްސާ ކުރިއަށް ގެންދާނީ ބްރޭކް ވެސް ނަގަމުންނެވެ.

ރިޔާސަތުގެ ހުށަހެޅުން މަޖިލީހުން ފާސްކޮށްފައި ވަނީ 52 މެންބަރުންގެ ވޯޓުންނެވެ. ވޯޓަށްފަހު މިހާރު ވަނީ ބަޖެޓަށް ބަހުސް ކުރަން ފަށާފަ އެވެ.

ބަޖެޓު ހުށަހަޅުއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވި ގޮތުގައި ބަޖެޓުގެ ތެރެއިން ހަރަދުގެ ގޮތުގައި ހިނގާނީ 49.2 ބިލިއަން ރުފިޔާ ކަމަށެވެ.

އޭގެ ތެރެއިން 35.9 ބިލިއަން ރުފިޔާއަކީ ރިކަރަންޓް ހަރަދެވެ. 13.3 ބިލިއަން ރުފިޔާއަކީ ކެޕިޓަލް ހަރަދެވެ. މީގެ އިތުރުން ދައުލަތުގެ ދަރަނި އަދާކުރުމަށް 3.9 ބިލިއަން ރުފިޔާ ވަނީ ހިމަނާފަ އެވެ.

މީގެ އިތުރުން ސަރުކާރުން ލޯނު ދޫކުރުމަށް ކަނޑައަޅާފައިވާ 3.2 ބިލިއަން ރުފިޔާ ވަނީ ބަޖެޓުގައި ހިމަނާފަ އެވެ. މީގެ ތެރޭގައި ފަސް އިންސައްތަ އިންޓްރެސްޓުގައި ގެދޮރުވެރިކަމުގެ ލޯނު ދޫކުރުމަށް އެއް ބިލިއަން ރުފިޔާ ހިމެނެ އެވެ.

އަންނަ އަހަރު އާމްދަނީ އާއި ހިލޭ އެހީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު އަންނަ އަހަރަށް ހުށަހަޅަނީ 9.4 ބިލިއަން ރުފިޔާ ޑެފިސިޓް ބަޖެޓެކެވެ.