އިޒްރޭލް ޕާސްޕޯޓު މަނާކުރުން އަވަސްކުރަން ހުށަހެޅި ގަރާރު ބޭރުކޮށްލައިފި

އަލީ ރާޒީ

20 ނޮވެމްބަރ 2024 - 12:19

0 comments

އިޒްރޭލުން ފަލަސްތީނަށް ދެމުން ގެންދާ ހަމަލާތަކާ ގުޅިގެން އިޒްރޭލުގެ ޕާސްޕޯޓު ރާއްޖޭގައި މަނާކުރަން ހުށަހަޅާފައިވާ ބިލުގެ މަސައްކަތް އަވަސްކުރަން ގޮވާލައި އެމްޑީޕީން ހުށަހެޅި ގަރާރު ބޭރުކޮށްލައިފި އެވެ.

އިޒްރޭލު ޕާސްޕޯޓްގައި ރާއްޖެއަށް އައުން މަނާކުރުމަށް އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް އެވެ.

އެ ބިލްގެ މަސައްކަތް އަވަސްކުރަން ގޮވާލާ ގަރާރެއް ހުށަހެޅުއްވީ އިދިކޮޅު އެމްޑީޕީގެ ގަލޮޅު އުތުރު ދާއިރާގެ މުހައްމަދު އިބްރާހީމް އެވެ.

ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި ގަރާރަށް ބަހުސް ކުރުމަށް ފަހު މިއަދުގެ ޖަލްސާގައި ނެގި ވޯޓުގައި ބައިވެރިވި 63 މެންބަރުން ވޯޓު ދެއްވީ އެ ގަރާރު ބަލައިގަންނަން ނުފެންނަ ކަމަށެވެ. އަދި ގަރާރު ބަލައިގަންނަން ފެންނަ ކަމަށް ވޯޓު ދެއްވީ 15 މެންބަރުންނެވެ. އަދި ވަކި ގޮތަކަށް ވޯޓު ދޭން ބޭނުން ނުވާ ކަމަށް އެއް މެންބަރަކު ވޯޓު ދެއްވި އެވެ.

އެހެންވެ އެ ގަރާރު ބަލައިގަތުމަށް ފާސް ނުވާ ކަމަށް މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ އިއުލާން ކުރެއްވި އެވެ.

އިޒްރޭލް ޕާސްޕޯޓުގައި ރާއްޖެ އައުން މަނާކުރުމަށް އިމިގްރޭޝަން ގާނޫނަށް ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް އިސްލާހެއް ހުށަހަޅާފައި ވަނިކޮށް ސަރުކާރުން ވަނީ ކެބިނެޓް ބައްދަލުވުމެއް ބާއްވައި، ޕާސްޕޯޓު މަނާކުރަން ނިންމާފައިވާކަން އިއުލާންކޮށްފަ އެވެ. ކުޑޫގެ ގަރާރުގައި ވަނީ ސަރުކާރުގެ އެ ނިންމުމުގައި އަމަލީ ސިފައެއް ޖެއްސުމަށް އެއްވެސް ކަމެއް ކޮށްފައި ނުވާ ކަމަށެވެ.