ގާނޫނުއަސާސީ ވީހާ ވެސް އަވަހަށް އިސްލާހުކުރަން މުޅި މަޖިލީހުގެ ކޮމިޓީއަށް

ހަސަން ހަލީމް

20 ނޮވެމްބަރ 2024 - 13:06

0 comments

ގާނޫނުއަސާސީއަށް ހުށަހެޅި އިސްލާހުތައް ރައްޔިތުންގެ މަޖިލީހަށް ބަލައިގަނެ ދިރާސާކުރަން މުޅި މަޖިލީހުގެ ކޮމިޓީއަށް ފޮނުވައިފި އެވެ.

ގާނޫނުއަސާސީއަށް އިސްލާހު ހުށަހެޅުއްވީ ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދު އެވެ.

މި އިސްލާހު މަޖިލީހަށް ބަލައިގަންނަން ފެންނަ ކަމަށް 69 މެންބަރުން ވޯޓު ދެއްވިިއިރު ނުފެންނަ ކަމަށް 12 މެންބަރުން ވޯޓު ދެއްވި އެވެ.

އޭގެ އިތުރުން މަޖިލީހުގެ ނައިބު ރައީސް އަދި. ދިއްގަރު ދާއިރާގެ މެންބަރު އަހުމަދު ނާޒިމް ވަނީ އެ މައްސަލަ ދިރާސާ ކުރަން މުޅި މަޖިލީހުގެ ކޮމިޓީ އަށް ފޮނުވަން ހުށަހަޅައިފަ އެވެ. އެ ހުށަހެޅުމަށް ތާއީދު ކުރެއްވީ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހެވެ.

އެ ހުށަހެޅުމާ މެދު ގޮތެއް ނިންމުމަށް ނެގި ވޯޓުގައި ބައިވެރިވި 71 މެންބަރުން ވޯޓު ދެއްވީ މުޅި މަޖިލީހުގެ ކޮމިޓީ އަށް ފޮނުވުމަށެވެ.

އެ މައްސަލާގައި މުޅި މަޖިލީހުގެ ކޮމިޓީ ވެސް މިއަދު 12:30 ގައި ބާއްވާނެ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި އެވެ. ގާނޫނުއަސާސީއަށް ގެންނަ އިސްލާހުތައް ކޮމިޓީން ފާސްކޮށް، މިއަދު މަޖިލީހުގެ ތަޅުމުގައި ފާސްކުރާނެ ކަމަށް ބެލެވެއެވެ. އެއީ، ޕީއެންސީގެ ބައެއް މަޖިލީސް މެންބަރުން އިއްޔެ ވަނީ މި އިސްލާހުތައް ދުވަހުން ދުވަހަށް ފާސްކުރަން ސަރުކާރުން ބޭނުންވާ ކަމަށް ވިދާޅުވެފައެވެ.

ގާނޫނުއަސާސީ އަށް ހުށަހެޅުއްވި އިސްލާހުގައި ބުނާ ގޮތުން ވަކި ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަ ކޮށްގެން އިންތިހާބުވުމަށް ފަހު، އެ ދައުރުގެ ތެރޭގައި އެ ސިޔާސީ ޕާޓީއަކުން އަމިއްލަ އަށް ވަކިވެއްޖެ ނަމަ ނުވަތަ ޕާޓީން ވަކި ކޮށްފި ނަމަ ނުވަތަ އެހެން ސިޔާސީ ޕާޓީއެއްގެ މެންބަރަކަށް ވެއްޖެ ނަމަ އެ މީހަކު މަޖިލިހުގެ މެންބަރުކަމުން ވަކިވާނެ އެވެ.

އޭގެ އިތުރުން މަޖިލިހުގެ މެންބަރަކު މިހާރު ތަމްސީލް ކުރާ ސިޔާސީ ޕާޓީން އަމިއްލަ އަށް ވަކިވެއްޖެ ނަމަ ނުވަތަ ވަކި ކޮށްފި ނަމަ ނުވަތަ އެހެން ޕާޓީއަކާ ގުޅިއްޖެ ނަމަ ވެސް ގޮނޑި ގެއްލޭނެ ކަމަށް އެ އިސްލާހުގައި ވެ އެވެ.

އަމިއްލަ ގޮތުން ވާދަކޮށްގެން އިންތިހާބުވާ މެންބަރަކު ސިޔާސީ ޕާޓީއަކާ ގުޅިވަޑައިގެންފި ނަމަ ވެސް އެ މެންބަރެއްގެ ގޮނޑި ގެއްލޭނެ ކަމަށް އެ އިސްލާހުގައި ބަޔާންކޮށްފައި ވެ އެވެ.