ތައިލޭންޑަށް ކަނޑައަޅާ ސަފީރަކަށް ފުއާދުގެ ނަންފުޅު

އިސްމާއިލް ރިޒާ

25 ނޮވެމްބަރ 2024 - 09:40

0 comments

އިލެކްޝަން ކޮމިޝަން (އީސީ) ގެ ރައީސް ކަމުގައި ހުންނެވި ފުއާދު ތައުފީގުގެ ދައުރު ހަމަވުމުން، ތައިލެންޑުގައި ހުންނަވާ ދިވެހި ސަފީރަކަށް އޭނާ އައްޔަން ކުރުމަށް ނިންމައި، ރުހުން ހޯދުމަށް މަޖިލީހަށް ފޮނުވައިފި އެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާއަށް ރައީސް ފޮނުއްވި ސިޓީ ޖަލްސާގައިވަނީ އިއްވަވާފަ އެވެ. އެ ސިޓީގައި ރައީސް ވިދާޅުވެފައިވަނީ ތައިލޭންޑުގައި ހުންނަވާ ސަފީރުގެ މަގާމަށް ފުއާދު އައްޔަންކުރައްވަން ގަސްތުކުރައްވާތީ އޭނާގެ ނަންފުޅު މަޖިލީހަށް ފޮނުއްވާ ކަމަށެވެ.

މަޖިލީހުގެ ރިޔާސަތުންވަނީ ފުއާދުގެ ނަންފުޅު ދިރާސާކުރުމަށް ކަމާ ގުޅުންހުރި ކޮމިޓީއަށް ފޮނުއްވާފަ އެވެ. ގައުމުތަކަށް އައްޔަންކުރައްވާ ސަފީރުންގެ ނަންފުޅުތައް ދިރާސާކުރާނީ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީންނެވެ.

ފުއާދުގެ މެމްބަރުކަމުގެ ދައުރު ހަމަވީ މިދިޔަ ހޮނިހިރު ދުވަހު އެވެ. ދެ ވަނަ ދައުރަކަށް އޭނާ އެ މަގާމަށް އައްޔަން ކުރެއްވީ ނޮވެމްބަރު، 2019 ގަ އެވެ. އީސީގެ ގަވައިދު ބުނާ ގޮތުން އެ ކޮމިޝަންގެ މެންބަރުކަން ދެ ދައުރަށް ވުރެ ގިނަ ދައުރު އަދައެއް ނުކުރެވޭނެ އެވެ.

އިންތިހާބުތަކާ ގުޅޭ ގިނަ ތަޖުރިބާތަކެއް ލިބިވަޑައިގެންފައިވާ ފުއާދު ވަނީ 1978 ވަނަ އަހަރުން ފެށިގެން އެކި އިންތިހާބުތަކުގައި މަސައްކަތް ކުރައްވައިފަ އެވެ.