އިންޓެގްރިޓީ ކޮމިޝަނަށް އިންޝާގެ ނަން ފޮނުއްވައިފި

މަރިޔަމް އަނާ

25 ނޮވެމްބަރ 2024 - 10:36

0 comments

ނޭޝަނަލް އިންޓަގްރިޓީ ކޮމިޝަން(އެންއައިސީ)ގެ މެންބަރަކަށް އައްޔަންކުރުމަށް މަރިޔަމް އިންޝާގެ ނަން ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހަޅުއްވައިފި އެވެ.

އިންޝާ، އެ މަގާމަށް އައްޔަނުކުރުމަށް ނަން ފޮނުއްވާފައިވަނީ، އެންއައިސީގެ މެންބަރު އަހުމަދު ޖިހާދުގެ ދައުރު ހަމަވުމާ ގުޅިގެންނެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި ރައީސްގެ މޭޒުން ހުށަހަޅާ ކަމެއްގެ ގޮތުގައި އޮތީ އެންއައިސީގެ މެންބަރުކަމަށް ރައީސް މުއިއްޒު ފޮނުއްވި ނަން، ދާއިމީ ކޮމިޓީއަށް ފޮނުވުމެވެ. އެގޮތުން، ރައީސް ހުށަހަޅުއްވާފައިވަނީ އިންޝާގެ ނަމެވެ.

އެހެންވެ، ރިޔާސަތުން ވަނީ މިނިވަން މުއައްސަސާތަކުގެ ކޮމިޓީއަށް އެ މައްސަލަ އިތުރަށް ދިރާސާކުރަން ފޮނުވާފަ އެވެ.

އިންޝާ ވަނީ މީގެ ކުރިން އެ ކޮމިޝަންގެ ސީނިއާ އިންވެސްޓިގޭޓަރެއްގެ މަގާމުއަދާކުރައްވާފަ އެވެ.