ނުވަ ލައްކަ ރުފިޔާގެ ޑްރަގްސް އަތުލައިގެންފި

އިސްމާއިލް ރިޒާ

02 ޑިސެމްބަރ 2024 - 09:17

0 comments

ކަސްޓަމްސްއިން އަތުލައިގަތް 395 ކިލޯ ގުރާމުގެ މަސްތުވާތަކެތި -- ފޮޓޯ/ ކަސްޓަމްސް

ރާއްޖެ އެތެރެކުރަން އުޅުނުން ނުވަ ލައްކަ ރުފިޔާއަށްވުރެ ގިނަ އަދަދެއްގެ މަސްތުވާތަކެތި މޯލްޑިވްސް ކަސްޓަމްސް ސާވިސްއިން އިއްޔެ އަތުލައިގެންފި އެވެ.

ކަސްޓަމްސް އިން ބުނި ގޮތުގައި މިތަކެތި އަތުލައިގަނެފައިވަނީ ކުރިއާ މެދުވެރިކޮށް ރާއްޖެއަށް ގެނައި ޕެކޭޖެއްގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރޭގައި ކަމަށެވެ.

އެގޮތުން މިދިޔަ ހޯމަ ދުވަހު ކުރިއާ މެދުވެރިކޮށް ރާއްޖެ ގެނެސްފައިވާ އެ ޕެކޭޖު ބަލާ ފާސްކުރިއިރު، އެ ޕެކޭޖުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާއިރު، ފުރަތަމަ މަރުހަލާގައި ކަސްޓަމްސް އިން އެ ތަކެތި ތަހުލީލުކުރިއިރު، މަސްތުވާތަކެތީގެ ބާވަތެއް ކަމަށްވާ ކޮކެއިން އަށް ވަނީ ޕޮޒިޓިވް ވެފައިވާ ކަމަށް އެ އިދާރާއިން ބުނެ އެވެ.

ކަސްޓަމްސްއިން ވަނީ މި ތަކެތީގެ މަގުމަތީ އަގަކީ 987،500 ދިވެހި ރުފިޔާ ކަމަށް ލަފާކުރެވޭ ކަމަށް ބުނެފައެވެ. އަދި މި މައްސަލަ އިތުރަށް ތަހުގީގުކުރުމަށް މައްސަލައިގައި އަތުލެވުނު މަސްތުވާ ތަކެއްޗާއި މައްސަލައިގައި ޝާމިލްވާ ދިވެހި ފިރިހެނަކު މިހާރު ފުލުހުންނާއި ހަވާލުކޮށްފައި ވާކަމަށް ކަސްޓަމްސްއިން ވަނީ ބުނެފަ އެވެ.