ތިން މިލިއަން ރުފިޔާގެ ޑްރަގްސް އަތުލައިގެންފި

މަރިޔަމް އަނާ

02 ނޮވެމްބަރ 2024 - 22:46

0 comments

ވައިގެމަގުން ރާއްޖެ އެތެރެކުރަން އުޅުނު ޖުމްލަ 5.9 ކިލޯގްރާމްގެ މަސްތުވާތަކެތި ކަސްޓަމުން އަތުލައިގެންފި އެވެ.

ކަސްޓަމްސް އިން ބުނީ މިތަކެތި އަތުލައިގަނެފައިވަނީ ރާއްޖެ ގެނެސްފައިވާ އެއާފްރައިޓް ޝިޕްމަންޓެއް ބަލައިފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރޭގައި ކަމަށެވެ.

އެގޮތުން މިދިޔަ ބުރާސްފަތި ދުވަހު ބެންކޮކުން ރާއްޖެ ގެނެސްފައިވާ އެއާފްރައިޓް ޝިޕްމަންޓެއް ބަލައިފާސްކުރުމުގެ ތެރޭގައި، އެ ޝިޕްމަންޓުގައި މަސްތުވާތަކެތި ފޮރުވާފައި ހުރިކަމަށް ޝައްކުކުރެވިގެން، އިތުރަށް ބެލިބެލުމުން، މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާކަމަށް ކަސްޓަމްސް އިން ބުނެ އެވެ.

އެއީ 5.5 ކިލޯގެ ކެނެބިސްއާއި 416 ގްރާމްގެ ކެތިނޯން އެވެ.

ބަރުދަން ޖުމްލަ 5.9 ކިލޯއަށް އަރާ މިތަކެތީގެ މަގުމަތީ އަގަކީ 3,348,000.00 ދިވެހި ރުފިޔާކަމަށް ކަސްޓަމްސްއިން ލަފާ ކުރެ އެެވެ.

ވަގަށް ވައިގެ މަގުންނާއި ކާގޯ މެދުވެރިކޮށް މަސްތުވާތަކެތި އެތެރެކުރަން އުޅުމުގެ މައްސަލަތައް މިފަހުން ވަނީ އިތުރުވެފަ އެވެ.