ޑްރަގް ޓްރެފިކިން މައްސަލައިގައި ބެންކޮކުން ދިވެއްސަކު ހައްޔަރުކޮށްފި

މަރިޔަމް އަނާ

17 ނޮވެމްބަރ 2024 - 10:57

0 comments

ޑްރަގު ޓްރެފިކިން މައްސަލައިގައި ބެންކޮކުން ދިވެހި ފިރިހެނަކު ހައްޔަރުކޮށް ގެންދަނީ.-- ފޮޓޯ: ޕަޓާޔާ

މަސްތުވާތަކެތި ޓްރެފިކް ކުރުމުގެ ތުހުމަތުގައި، ދިވެއްސަކު ތައިލެންޑުގެ ވެރިރަށް ބެންކޮކުން ހައްޔަރުކޮށްފި އެވެ.

އެ ގައުމުގެ ނޫސްތަކުން އިއްޔެ ރިޕޯޓުކޮށްފައިވާ ގޮތުގައި އެ މައްސަލާގައި، އިނގިރޭސިވިލާތުން ފޮނުވި ޕްރޮޓީން ސަޕްލިމެންޓް ކޮންޓެއިނަރެއްގައި ފޮރުވާފައި ހުރި ގާތްގަނޑަކަށް ތިން ކިލޯގެ މެފެޑްރޯން އަތުލައިގެންފައިވެއެވެ.

އެއީ ކެޓަގަރީ އެކެއްގެ މަސްތުވާތަކެތި ކަމަށް ބުނެފައިވެއެވެ.

އެ މަސްތުވާތަކެތި އަތުލައިގަތީ ބެންކޮކްގެ ކޫރިއާ ފެސިލިޓީއަކުން ދިވެހި ފިރިހެނަކު އެ ޕެކޭޖު ނަގަން އުޅެނިކޮށް ކަމަށް ވެސް ރިޕޯޓުކޮށްފައިވެއެވެ.

ހައްޔަރުކުރި ދިވެހިއްސަކީ ކޮން ނަމެއް ކިޔާ މީހެއް ކަމެއް ހާމައެއް ނުކުރެ އެވެ. އޯއެންސީބީން ބުނީ ނަން ހާމަ ނުކުރީ ނެޓްވޯކާ ގުޅުން ހުރި އެހެން މީހުން ދެނެގަތުމުގެ ތަހުގީގު އަދިވެސް ކުރިއަށްދާތީ ކަމަށެވެ.

ތައިލެންޑުގެ ފުލުހުން ވަނީ އެމްޑީއެމްއޭ، އެކްސްޓަސީ، ކޮކެއިން، ކެޓަމިން އަދި ޝައްކުކުރެވޭ އެހެން ބައެއް ތަކެތި ވެސް ތަހުގީގުގައި ހޯދައިފަ އެވެ. އޭގެ ތެރޭގައި އަލަށް ފެންނަމުން އަންނަ ޑްރަގްގެ ބާވަތްތައް ވެސް ފެނިފައިވެ އެވެ. މި ބާވަތްތަކަކީ މިހާރަކަށް އައިސް އަތުލައިގަންނަ ޑްރަގްތަކުގެ ތެރޭގައި އިތުރުވަމުން އަންނަ ބާވަތްތަކެކެވެ.