ދަނޑު ހެއްދުމުގެ ބޮޑު މަޝްރޫއު ޔޫޓީއެފުން ފުށިދިއްގަރު ފަޅަށް ބަދަލުކޮށްފި

އަހުމަދު ނިހާން

02 ޑިސެމްބަރ 2024 - 12:30

0 comments

އެމްއައިޑީ އާއި ޗައިނާ ހާބާ އިންޖިނިއަރިން ކޮމްޕެނީއާއެކު ބޭއްވި އެމްއޯޔޫގައި ސޮއިކުރުން

ރާއްޖެއިން ބޭރުން އެތެރެކުރާ ކާނާގެ ބާވަތްތައް މަދުކޮށް، ރާއްޖޭގެ ފުޑް ސެކިއުރިޓީ ޔަގީން ކުރަން އުތުރުތިލަފަޅުގައި ފަށަން ނިންމި މަޝްރޫއު ފުށިދިއްގަރުފަޅަށް ބަދަލުކޮށްފި އެވެ.

އެސްޓީއޯ، އެމްއޭސީއެލް، އެމްޕީއެލް، އެމްޓީސީސީ އަދި އެޗްޑީސީ ގުޅިގެން މި ސަރުކާރުން އުފެއްދި މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން (އެމްއައިޑީ) އާއި ޗައިނާ ހާބާ އިންޖިނިއަރިން ކޮމްޕެނީ ލިމިޓެޑާ އެކު ޖޫން މަސް ތެރޭ އެމްއޯޔޫއެއްގައި ސޮއިކުރީ އުތުރުތިލަފަޅުން 200 ހެކްޓަރުގެ ބިން ހިއްކައިގެން ދަނޑުވެރިކަމުގެ ބޮޑު މަޝްރޫއެއް ހިންގުމަށެވެ.

އޮންލައިން ނޫސް "ދައުރު"އަށް މިދިޔަ ބުރާސްފަތި ދުވަހު ދެއްވި އިންޓަވިއުއެއްގައި އެ މަޝްރޫއުގެ ފަހުގެ މައުލޫމާތު ދެއްވަމުން އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވިދާޅުވީ އެ މަޝްރޫއު ފެށުމަށް ރޭވި މުއްދަތަށް ވުރެ ލަސްވެފައި ވަނީ މަޝްރޫއު ހިންގުމަށް ބޭނުންވާ ތަން ނުލިބިގެން ކަމަށެވެ.

އޭނާ ވިދާޅުވީ މޭވާ ތަރުކާރީގެ އިތުރަށް އެ މަޝްރޫއުގެ ދަށުން ކުކުޅު ބިސް ވެސް އުފެއްދުމަަށް ނިންމާފައިވާ ކަމަށެވެ. އަދި ކުކުޅު ބިހަކީ މިހާރު ވެސް ބައެއް އަމިއްލަ ފަރާތްތަކުން ރާއްޖޭގައި އުފައްދާ އެއްޗެއްކަން ފާހަގަ ކުރައްވައި އޭނާ ވިދާޅުވީ އެސްޓީއޯގެ އަމާޒަކީ ރާއްޖެއަށް އެތެރެކުރާ ބިހަށް ވުރެ ކޮލިޓީ ރަނގަޅު އޯގެނިކް ބިސް ރާއްޖެއިން ލިބޭނޭ ގޮތަށް ހެދުން ކަމަށެވެ.

އުތުރުތިލަފަޅުން ހިއްކާ 200 ހެކްޓަރުގެ ބިމުގައި ދެން ހިންގާނީ ކޮން މަޝްރޫއުއެއް ކަމެއް ސަރުކާރުން އަދި ހާމައެއް ނުކުރެ އެވެ. ދަނޑުވެރިކަމުގެ މަޝްރޫއުއަށް ފުށިދިއްގަރު ފަޅުން ދޫކުރަންޖެހޭ ބޮޑު ބިމާ އެކު، ރަސްމާލެ މަޝްރޫއުގެ ޕްލޭނަށް ބޮޑު ބަދަލެއް އަންނާނެ ކަމަށް ބެލެވޭއިރު، އެ ތަން ހިއްކުމުގެ މަސައްކަތް އަދި ނުނިމެ އެވެ. ރަސްމާލޭގައި ބައެއް މަޝްރޫއުތައް ހިންގަން ޗައިނާގެ ކުންފުނިތަކުން ޝައުގުވެރިކަން ފާޅުކޮށްފައިވެ އެވެ.

ރައީސް މުއިއްޒު މީގެކުރިން ވިދާޅުވި ގޮތުގައި އުތުރު ތިލަފަޅުގައި ދަނޑުވެރިކަމުގެ މަޝްރޫއު ކުރިއަށް ގެންދިއުމަށްޓަކައި 200 ހެކްޓަރުގެ ބިން ހިއްކާނެ އެވެ.

ރައީސް ޑރ. މުއިއްޒު ވެރިކަމާ ހަވާލުވެވަޑައިގެންތާ ކުރީކޮޅު އުތުރު ތިލަފަޅުގައި ދަނޑުވެރިކަމުގެ މަޝްރޫއުއެއް ކުރިއަށް ގެންދަން ނިންމުމުން އޭރު އިންޑިއާ އިން އެކަމުގައި ކަންބޮޑުވުންތަކެއްވެސް ދިވެހި ސަރުކާރާ ހިއްސާކުރި އެވެ. އަދި ރައީސް ޑރ. މުއިއްޒު މިދިޔަ އޮކްޓޫބަރު މަހު އިންޑިއާ އަށް ކުރެއްވި ރަސްމީ ދަތުރުފުޅުގައި އުތުރުތިލަފަޅުގައި ޑޮކްޔާޑް މަޝްރޫއު އަލުން ކުރިއަށް ގެންދިއުމަށްވެސް އިންޑިއާ އިން މަޝްވަރާކޮށްފައިވެ އެވެ.

ފުށިދިއްގަރުފަޅަކީ އެ ފަޅު ހިއްކައިގެން "ރަސްމާލެ"ގެ ނަމުގައި ރައީސް ޑރ. މުއިއްޒުގެ ސަރުކާރުން ތަރައްގީކުރުމަށް ނިންމާފައިވާ އެންމެ ޒަމާނީ ސިޓީ އެކެވެ. ރަސްމާލެ އަކީ ރައީސް މުއިއްޒު ގެންގުޅުއްވާ ބޯހިޔާވަހިކަމުގެ ސިޔާސަތުގައި ހިމެނޭ އެންމެ މުހިއްމު ތަނެވެ.