ދަރިވަރުން ގްރޫމްކުރި ޓީޗަރަކަށް ދައުވާ ކުރަނީ

މަރިޔަމް އަނާ

05 ޑިސެމްބަރ 2024 - 13:55

0 comments

ދަރިވަރުންގެ އުމުރާ ނުގުޅޭ ވާހަކަ ދައްކާ، ދަރިވަރުން ގްރޫމްކުރި ޓީޗަރެއްގެ މައްޗަށް ދައުވާ އުފުލުމަށް ޕްރޮސެކިއުޓާ ޖެނެރަލް (ޕީޖީ) އޮފީހަށް މިދިޔަ މަހުގެ 25ވަނަ ދުވަހު ފޮނުވާފައި ވާކަމަށް ފުލުހުން ބުނެފި އެވެ.

ފުލުހުން މިއަދު މީޑިއާތަކަށް ފުލުހުން ފޮނުވި މެސެޖެއްގައި ބުނީ އެ މައްސަލައިގައި 29 އަހަރުގެ ދިވެހި ޓީޗަރު ހައްޔަރުކުރީ ސައުތު ސެންޓްރަލް ޕޮލިސް (މ، ފ، ދ، ތ، ލ) ގެ ރަށަކުން ކަމަށެވެ.

ކޯޓު އަމުރެއްގެ ދަށުން އޭނަ ހައްޔަރު ކުރީ މިދިޔަ އޮކްޓޯބަރު މަހުގެ 27 ގަ އެވެ.

ފުލުހުން ބުނީ އޭނަ ހައްޔަރުކޮށް ބަންދާ މެދު ގޮތެއް ނިންމުމަށް ކޯޓަށް ފުރަތަމަ ހާޒިރު ކުރުމުން ބަންދަށް 20 ދުވަސް ޖެހި ކަމަށެވެ. އަދި އެ މުއްދަތު ހަމަވުމުން، ދެވަނަ ފަހަރަށް ކޯޓަށް ހާޒިރު ކުރުމުން 30 ދުވަހަށް ބަންދު ކުރަން ކޯޓުން އަމުރު ކުރި ކަމަށް ވެސް ފުލުހުން ބުންޏެވެ.

މިފަދަ މައްސަލަތައް ރާއްޖޭގެ އެކި ހިސާބުތަކުން ދޭތެރެއަކުން ފެންމަތިވެއެވެ.