މޫސުމަށް އަންނަ ބަދަލުތަކުގެ މައްސަލާގައި އައިސީޖޭގައި ބޭއްވި އަޑުއެހުމެއްގައި ރާއްޖޭގެ ބަޔާންދީފި

އަލީ ރާޒީ

07 ޑިސެމްބަރ 2024 - 01:32

0 comments

މޫސުމަށް އަންނަ ބަދަލުތަކުގެ މައްސަލައިގައި އެކި ގައުމުތަކުގެ މަސްއޫލިއްޔަތުތަކާ ގުޅޭގޮތުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގެ އިޝްތިޝާރީ ލަފަޔަކަށް އެދި އދ ގެ އާންމު މަޖިލީހުން ހުށަހަޅާފައިވާ މައްސަލައިގައި މިއަދު ބޭއްވި އަޑުއެހުމުގައި ރާއްޖެއިން ބައިވެރިވެ، ރާއްޖެ ފަދަ ނާޒުކު ގައުމުތަކަށް ބައިނަލްއަގުވާމީ މުޖުތަމައުއިން އެހީ ފޯރުކޮށްދިނުމަށް ގޮވާލައިފި އެވެ.

މިއީ މޫސުމަށް އަންނަ ބަދަލުތަކުގެ މައްސަލައިގައި ގައުމުތަކުގެ މަސްއޫލިއްޔަތުތަކާ ގުޅޭގޮތުން އުފެދޭ ގާނޫނީ ބައެއް ސުވާލުތަކާ ގުޅޭގޮތުން، އައިސީޖޭގެ އިސްތިޝާރީ ލަފައެއް ހޯދުމަށް އެދި އދގެ 77 ވަނަ އާންމު މަޖިލީހުން ފާސްކުރި ގަރާރެއްގެ ދަށުން ހުށަހަޅާފައިވާ މައްސަލަ އެކެވެ.

މި މައްސަލައިގައި ކުރިއަށްދާ އާންމުކޮށް ހުޅުވާލައިގެން ބާއްވާ އަޑުއެހުންތަކުގައި ބައިވެރިވެ ބަޔާނެއް ހުށަހެޅުމުގެ ފުރުސަތު ގައުމުތަކަށާއި ބައިނަލްއަގްވާމީ ޖަމިއްޔާތަކަށް ވަނީ ހުޅުވާލާފަ އެވެ.

އެގޮތުން އައިސީޖޭގައި މިއަދު ބޭއްވި އަޑުއެހުމުގައި ދިވެހިރާއްޖެ ތަމްސީލް ކުރައްވަމުން ބަންޑާރަނައިބް އަހްމަދު އުޝާމް ވަނީ މޫސުމަށް އަންނަ ބަދަލުތަކުގެ މައްސަލައިގައި ކެނޑިނޭޅި ވަކާލާތުކުރެއްވުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިސްނެންގެވުން ފާހަގަކުރައްވާފަ އެވެ.

ރާއްޖެއިން ހުށަހެޅި ބަޔާންތަކުގައި ތިމާވެށްޓާބެހޭ ބައިނަލްއަގުވާމީ ގާނޫނުތަކުގެ ދަށުން ދިވެހިރާއްޖެ ފަދަ ތަރައްގީވަމުން އަންނަ ގައުމުތަކުން އެހީތެރިކަން ފޯރުކޮށްދިނުމަށް އޮންނަ ޒިންމާތަކަށް އަލި އަޅުވައިލި ކަމަށް އޭޖީ އޮފީހުން ބުންޏެވެ. އަދި ކަސްޓަމަރީ އިންޓަނޭޝަނަލް ލޯގެ ދަށުން ގައުމުތަކަށް އެއްބާރުލުން ދިނުމަށް އޮންނަ ޒިންމާ ރާއްޖޭގެ ގާނޫނީ ވަކީލުން ތަފުސީލުކޮށްދެއްވި ކަމަށް ވެސް އެ އޮފީހުން ބުންޏެވެ.

އޭޖީ އޮފީހުން ވަނީ، މޫސުމަށް އަންނަ ބަދަލުތަކުގެ ސަބަބުން ތިމާވެއްޓަށް ކުރާ ނޭދެވޭ އަސަރުތަކުން އަރައިގަތުމަށް ބައިނަލްއަގުވާމީ މުޖުތަމަޢުއާ ގުޅިގެން މަސައްކަތްކުރުމުގަޔާއި ރައްޔިތުންގެ ޙައްޤުގައި ވަކާލާތުކުރުމުގައި ސަރުކާރުން ސާބިތުކަމާ އެއްކޮށް އޮންނާނެކަމުގެ ޔަޤީންކަން ދީފައެވެ،